Këshilli i Ministrave ka miratuar ngritjen e bazës shtetërore të të dhënave të quajtur "Regjistri Kombëtar i Aktivitetit të Licencuar dhe të Lejuar të Bimës së Cannabis-it". Vendimi zyrtarizon krijimin e një platforme digjitale me gjurmueshmëri të plotë për të gjithë zinxhirin e prodhimit të kanabisit për qëllime mjekësore e industriale — nga faza e parë e kultivimit deri te asgjësimi i mbetjeve. Propozimi erdhi nga tre ministri njëherësh: Shëndetësia, Bujqësia dhe Punët e Brendshme, duke reflektuar natyrën ndërinstitucionale të kësaj nisme.
Baza ligjore e vendimit mbështetet në legjislacionin e vitit 2023 për kontrollin e kanabisit. Si institucion administrues caktohet Agjencia Kombëtare e Kontrollit të Cannabis-it, e njohur me shkurtimin AKKC, ndërsa aspektet teknike të platformës do të menaxhohen nga Agjencia Kombëtare e Shoqërisë së Informacionit.
Çfarë regjistron dhe si funksionon platforma
Regjistri i ri do të arkivojë në formë elektronike të gjitha të dhënat e lidhura me aktivitetin e licencuar: kërkesat fillestare për leje e licenca, operacionet teknike në terren, rezultatet e analizave laboratorike, eksportet dhe proceset e asgjësimit të mbetjeve. Aplikimet do të procesohen nëpërmjet portalit qeveritar "e-Albania", duke shmangur procedurat letre dhe duke ulur kohën e shqyrtimit administrativ.
Platforma do të shkëmbejë të dhëna automatikisht me disa sisteme kryesore shtetërore. Gjurmueshmëria e lëndës do të sigurohet nëpërmjet bashkëpunimit teknik me shoqërinë "ALBTrace CO". Kontrolli i identitetit të drejtuesve dhe aksionarëve do të bëhet përmes Gjendjes Civile dhe Qendrës Kombëtare të Biznesit, ndërsa detyrimet tatimore dhe deklaratat doganore të eksportit e importit do të verifikohen në kohë reale nëpërmjet Tatimeve dhe Doganave.
Sipas tekstit të vendimit, "në Regjistër regjistrohen të gjitha informacionet për kërkesat e vendimmarrjet për licencim, leje, gjurmim, mbikëqyrje, deri te pezullimi, shfuqizimi apo asgjësimi i bimëve e nënprodukteve".
Tre nivele aksesi dhe sanksione për shkeljet
Për të mbrojtur sigurinë e informacionit, vendimi përcakton tri kategori të qarta të aksesit në sistem: administratori, i cili është AKKC-ja me të drejta të plota; regjistruesi, me të drejtë korrigjimi brenda 24 orëve; dhe shikuesi, i cili ka akses vetëm për lexim pa mundësi ndërhyrjeje. Çdo veprim i kryer në platformë do të regjistrohet në regjistër auditimi të pamodifikueshëm.
Bizneset e licencuara që nuk hedhin të dhënat në kohë ose paraqesin informacion të pasaktë do të përballen me sanksione administrative. Veprimet e paligjshme në sistem sjellin pezullim të menjëhershëm të aksesit dhe përgjegjësi ligjore. Kostot e krijimit dhe mirëmbajtjes teknike të platformës do të mbulohen tërësisht nga buxheti i Agjencisë Kombëtare të Shoqërisë së Informacionit, pa ngarkesa shtesë për operatorët privatë. Hapi i ri përfaqëson një nga nismat më të strukturuara të shtetit shqiptar për dixhitalizimin e një sektori të rregulluar dhe konfirmoi angazhimin institucional për transparencë të plotë në industrinë e kanabisit ligjor.
BurimiJava News
