KESH shton importet e energjisë, blerjet arrijnë në 80 milionë euro!

Nga Ardit Lukaj17 Shtator 2026, 12:262 min lexim4

Ndaj

Korporata Elektroenergjetike Shqiptare (KESH) ka zgjeruar blerjet në tregun e energjisë gjatë shtatorit, duke e çuar në rreth 80 milionë euro vlerën totale të importeve të kontraktuara që nga vera, në një periudhë kur prodhimi vendas hidroenergjetik është kufizuar nga kushtet e pafavorshme hidrike dhe kërkesa për energji ka vijuar të rritet.

KESH ka siguruar rreth 570 mijë MWh energji përmes procedurave të blerjes të zhvilluara gjatë muajve të fundit, me një vlerë totale të përllogaritur prej rreth 80.3 milionë eurosh.

Pjesa më e madhe e importeve lidhet me periudhën 1 korrik–30 shtator, kur kompania kontraktoi 331,200 MWh energji me një çmim mesatar të ponderuar prej 125.47 euro/MWh, për një vlerë prej rreth 41.6 milionë euro.

Në gusht, KESH shtoi edhe 109,950 MWh të tjera në portofolin e blerjeve, me një vlerë rreth 16.2 milionë euro. Këto kontrata përfshinë 25,605 MWh për periudhën 22–30 gusht dhe 84,345 MWh për periudhën 31 gusht–30 shtator.

Rritja e kërkesës për energji në tregun e importit ka vijuar edhe në shtator, me katër procedura të reja blerjeje që mbulojnë periudhën deri në fillim të tetorit.

Në datat 5–6 shtator, KESH kontraktoi 13,395 MWh në katër lote, me çmime të ponderuara që varionin nga 139.42 euro/MWh deri në 168.33 euro/MWh.

Për periudhën 7–13 shtator, kompania siguroi 19,467 MWh të tjera në dy lote, me çmime të ponderuara prej 169.85 euro/MWh dhe 156.66 euro/MWh.

Një tjetër blerje u realizua për periudhën 12–13 shtator, ku KESH kontraktoi 10,560 MWh me çmim të ponderuar prej 166.82 euro/MWh.

Kontrata më e madhe e fundit lidhet me periudhën 14 shtator–11 tetor, ku KESH bleu 57,120 MWh me një çmim të ponderuar prej 196.80 euro/MWh, niveli më i lartë mes procedurave të fundit.

Në total, katër procedurat e fundit të shtatorit dhe fillimit të tetorit i shtuan portofolit të KESH 100,542 MWh energji me një kosto prej rreth 18.25 milionë euro.

Kthimi i KESH në pozicion blerësi vjen pas një fillimi viti me prodhim më të lartë hidroenergjetik, kur kompania operoi kryesisht si shitës në treg. Gjatë periudhës janar–prill, KESH shiti 456,945 MWh energji dhe arkëtoi 33.15 milionë euro me TVSH, me një çmim mesatar shitjeje prej 60.51 euro/MWh. /Monitor/

BurimiMonitor

#ekonomi

Ndaj

Lexo gjithashtu

Ekonomia

Ulen çmimet e naftës në tregjet botërore, sinjalet për qetësim mes SHBA-së dhe Iranit ndikojnë tregun

Ulen çmimet e naftës në tregjet botërore, sinjalet për qetësim mes SHBA-së dhe Iranit ndikojnë tregunÇmimi i naftës në tregjet ndërkombëtare ka pësuar një rënie të ndjeshme pas sinjaleve për një…

rreth 2 muaj më parë1 min

Ekonomia

Rekord të ardhurash në arkën e shtetit, por miliona euro fonde mbeten pa u përdorur!

Rekord të ardhurash në arkën e shtetit, por miliona euro fonde mbeten pa u përdorur!Më shumë para po mblidhen nga taksat e tatimet sesa po shpenzohen nga institucionet. Raporti i Ministrisë së Financave tregon se si rezultat i të ardhurave më të larta se shpenzimet, buxheti u mbyll me një suficit prej 563 milionë eurosh në gjashtëmujorin e parë të këtij viti. Në total arka e shtetit ka mbledhur 410.6 miliardë lekë ose rreth 4.3 miliardë euro në gjysmën e parë të vitit, duke u rritur me 12.2% krahasuar me të njëjtën periudhë të vitit të kaluar, madje duke tejkaluar edhe planin e Ministrisë së Financave për këtë periudhë me afro 207 milionë euro. Tatimi mbi Vlerën e Shtuar dhe tatimi mbi të ardhurat personale kanë pasur ecurinë më të mirë në këtë gjashtëmujor. Më konkretisht nga TVSH u mblodhën 120.7 miliardë lekë duke u rritur me 10.6% në raport me vjet, e ndikuar nga rritja e çmimeve por edhe nga shtimi i konsumit. Ndërsa nga tatimi mbi të Ardhurat Personale 47.5 miliardë lekë, ose 16.6% më shumë se në gjashtëmujorin e parë të vitit të kaluar. Rol në këtë rritje ka dhënë jo vetëm rritja e pagave si në shtet edhe në privat, por edhe formalizimi i tregut apo plotësimi i DIVA dhe pagimi i detyrimeve që rridhnin pas saj. Sa i takon shpenzimeve, vijon halli i vjetër, pasi mblidhen shumë para por nuk shpenzohen me të njëjtin ritëm. Janë 102 milionë euro shpenzime të planifikuara dhe të parealizuara. Deri në fund të qershorit Ministria e Financave thotë se janë shpenzuar 3.8 miliardë euro, ndërsa plani ishte që të harxhoheshin pak më shumë se 3.9 miliardë euro. Referuar të dhënave të ministrisë në këtë 6 mujor probleme janë hasur tek shpenzimet korrente të cilat arritën në 321 miliardë lekë ose 10,8 miliardë më pak se plani. Gjatë kësaj periudhe janë shpenzuar më pak para për pagat dhe sigurimet e administratës, nuk u realizua plani për interesat e borxhit si dhe nuk u harxhua sa ishte planifikuar as nga pushteti vendor. Kurse shpenzimet kapitale në gjashtëmujor ishin 36.7 miliardë lekë ose 10.2% më shumë se vjet.

rreth 2 muaj më parë2 min

Ekonomia

11 mijë biznese të reja në 6 muaj, investitorët e huaj shtojnë interesin për Shqipërinë

Përgjatë periudhës 6-mujore, bizneset në vendin tonë kanë patur një ecuri pozitive të aktivitetit të tyre ekonomik dhe administrativ sipas të dhënave zyrtare. Referuar të dhënave të Qendrës Kombëtare të Biznesit, gjatë 6-mujorit të parë të vitit 2026 janë regjistruar 11,567 subjekte të reja ose 806 më shumë se në të njëjtën periudhë të vitit të kaluar, duke shënuar një rritje prej 7.5%. Sipas QKB-së, struktura e regjistrimeve vijon të dominohet nga personat fizikë me 8,757 regjistrime ose 75.7% të totalit, ndjekur nga Shoqëritë me Përgjegjësi të Kufizuar (SHPK) me 2,775 regjistrime. Ndërsa sipas pronësisë, subjektet me kapital 100% shqiptar mbeten mbizotërues me 10,179 regjistrime, regjistrimet e bizneseve me kapital 100% të huaj u rritën ndjeshëm me 35.7%, duke arritur në 1,240 subjekte, një tregues i rritjes së interesit të investitorëve të huaj për ekonominë shqiptare. Të ndarë sipas zonave gjeografike, Qarku Tiranë vijon të kryesojë me 6,039 regjistrime për vitin 2026 ose 52.2% të totalit, i ndjekur nga Vlora me 1,347 dhe Durrësi me 1,310 regjistrime. Gjithashtu QKB në raportin më të fundit nënvizon se rritje të konsiderueshme u evidentuan edhe në qarqet në veri të vendit, Lezhë, Shkodër, Dibër dhe Kukës. Sektori i tregtisë me shumicë dhe pakicë mbetet më i preferuari për regjistrimin e bizneseve të reja, me 2,771 subjekte, i ndjekur nga akomodimi dhe shërbimi ushqimor, aktivitetet profesionale, transporti dhe informacioni e komunikacioni. Rritje të forta në 6-mujorin e 2026 janë shënuar edhe në sektorin e pasurive të paluajtshme përkatësisht me +35.8% dhe transporti e magazinimi me +26.3%. Të dhënat tregojnë rritje të regjistrimeve të reja të bizneseve, zgjerim të pjesëmarrjes së kapitalit të huaj, si edhe rritje të kërkesave për leje, licenca, si edhe aplikim në regjistrin e pronarëve përfitues. QKB, SUBJEKTET JANAR-QERSHOR 2026 11,567 subjekte të reja ose 7.5% krahasuar me 2025, Personat fizikë me 8,757 regjistrime, Shoqëritë me Përgjegjësi të Kufizuar (SHPK) me 2,775 regjistrime, Me kapital 100% shqiptar me 10,179 regjistrime, Biznese me kapital 100% të huaj 1,240 subjekte. QKB, SUBJEKTET SIPAS ZONAVE GJEOGRAFIKE Qarku Tiranë me 6,039 regjistrime, Qarku Vlorë me 1,347 regjistrime, Qarku Durrës me 1,310 regjistrime.

rreth 2 muaj më parë2 min