Evropa Jugore po përballet me një valë të re zjarresh shkatërruese, ndërsa temperaturat ekstreme vijojnë të përkeqësojnë situatën në Spanjë, Francë dhe vende të tjera të rajonit.Autoritetet kanë urdhëruar evakuimin e rreth 30 mijë personave, ndërsa mijëra zjarrfikës po luftojnë me flakët.
Qeveria spanjolle shpalli gjendje të jashtëzakonshme në rajonin e Madridit dhe provincën e Ávilës, pasi zjarret dolën jashtë kontrollit gjatë valës së tretë të të nxehtit për këtë verë.Temperaturat kanë arritur deri në 44.7 gradë Celsius, ndërsa rreth 10 mijë banorë janë evakuuar në zonat përreth Madridit. Për përballimin e situatës janë angazhuar edhe njësitë ushtarake të emergjencës.
Kryeministri Pedro Sánchez deklaroi se qeveria ka mobilizuar të gjitha mjetet në dispozicion për të frenuar flakët dhe u bëri thirrje qytetarëve të respektojnë udhëzimet e autoriteteve.
Sipas Sistemit Evropian të Informacionit për Zjarret në Pyje (EFFIS), mbi 1 milion hektarë janë djegur në Spanjë që nga fillimi i vitit.
Në Francën jugperëndimore, një zjarr masiv pranë Bordosë ka djegur mbi 37 mijë hektarë pyje brenda pak më shumë se 24 orësh.
Më shumë se 18 800 persona, përfshirë mijëra turistë, janë evakuuar nga kampingjet dhe shtëpitë e pushimit. Autoritetet raportojnë se disa banesa janë shkatërruar, ndërsa rreth 800 zjarrfikës dhe katër avionë po punojnë për izolimin e flakëve.
Flakët kanë përfshirë edhe zonën e Cap Ferret, një nga destinacionet më ekskluzive turistike të Francës, duke detyruar mbylljen e rrugëve dhe evakuimin e mijëra banorëve.
Një valë e fortë e të nxehtit detar po prek rreth 80% të Mesdheut, me temperaturat e ujit deri në 5 gradë Celsius mbi mesataren klimatike për periudhën 1991–2020.
Ndërkohë, sipas të dhënave të EFFIS, sipërfaqja e djegur në Bashkimin Evropian deri më 22 korrik është pothuajse dyfishuar krahasuar me mesataren e 20 viteve të fundit.
Shkencëtarët: Rrezik për skenarë si “Ferri i Dantes”
Ekspertët paralajmërojnë se ndryshimet klimatike dhe braktisja e tokave bujqësore po krijojnë kushte ideale për përhapjen e zjarreve me përmasa gjithnjë e më të mëdha.
Profesori i inxhinierisë pyjore në Universitetin e Lleidës, Víctor Resco de Dios, tha se nuk mund të përjashtohen më skenarë ekstremë të ngjashëm me ata të Kalifornisë apo Australisë.
“Së shpejti nuk do të mund të përjashtojmë skenarë si ‘Ferri i Dantes’, me zjarre që përfshijnë qindra mijëra apo edhe një milion hektarë,” u shpreh ai.
Shkencëtarët theksojnë se ndryshimet klimatike kanë rritur ndjeshëm rrezikun e thatësirës në Evropë, duke krijuar kushte ideale për përhapjen e zjarreve, ndërsa valët e
