Tensionet rreth urës së Ibrit në Mitrovicë kanë marrë përmasa ndërkombëtare, pasi presidenti serb Aleksandar Vuçiç njoftoi se do t'i dërgojë një letër zyrtare Sekretarit të Përgjithshëm të NATO-s, Mark Rutte. Vuçiç kërkon që kreu i Aleancës të ndërhyjë dhe të bllokojë hapjen e urës për qarkullim automjetesh — hap që Bashkimi Evropian e ka cilësuar të ligjshëm, pasi kushtet teknike dhe administrative janë plotësuar.
Ura e Ibrit, e cila ndan dy pjesët e qytetit të Mitrovicës, prej vitesh ka qenë e hapur vetëm për këmbësorë. Çështja e kalimit të automjeteve mbetet një nga pikat më të nxehta të tensioneve në veri të Kosovës dhe ka shërbyer prej kohësh si pretekst për Beogradin të ndërhyjë në punët e brendshme të shtetit kosovar.
Vuçiç sulmon komandantin turk të KFOR-it
Në deklaratat e tij, Vuçiç drejtoi akuza të forta ndaj gjeneralit turk Özkan Ulutaş, komandantit aktual të KFOR-it, duke e paraqitur atë si drejtuesin kryesor të procesit të hapjes së urës. "Këtë po e bën turku, komandanti i KFOR-it. Sot do t'i shkruaj Mark Rutes dhe shpresoj që ta pranojë kërkesën time që kjo të mos bëhet. Për mua, ky është një turp i madh dhe një zhgënjim" — deklaroi Vuçiç, duke shtuar se situata pasqyron sipas tij paaftësinë e Perëndimit për ta detyruar Serbinë të njohë pavarësinë e Kosovës.
"Ngadalë, gjërat po ndryshojnë në botë, por jo aq shpejt sa kemi pritur" — tha presidenti serb, duke sugjeruar se Beogradi pret ndryshime në ekuilibrat ndërkombëtarë që do t'i vinin atij në ndihmë.
Prishtina qëndron e vendosur, BE-ja mbështet hapjen
Qeveria e Kosovës, nën drejtimin e kryeministrit Albin Kurti, ka theksuar prej kohësh rëndësinë e ushtrimit të sovranitetit të plotë në veri të vendit, duke përfshirë edhe çështjen e lëvizjes së lirë në territorin kosovar. Hapja e urës për automjete paraqet një hap normal të zbatimit të rregullave të qarkullimit të njëjta me pjesën tjetër të Kosovës.
Bashkimi Evropian ka konfirmuar zyrtarisht se të gjitha kushtet e nevojshme janë plotësuar dhe procesi mund të vijojë. Qëndrimi i Brukselit e izolan politikisht Beogradin në këtë çështje, duke i lënë Vuçiçit si alternativë vetëm apelet ndaj strukturave ushtarake si NATO-ja dhe KFOR-i.
Letra e paralajmëruar e Vuçiçit ndaj Rutte-s pritet të mbetet pa efekt praktik, pasi NATO-ja vepron mbi bazën e mandatit ndërkombëtar të dakordësuar dhe nuk ka kompetencë të bllokojë hapa administrativë të Kosovës brenda territorit të vet. Megjithatë, gjestet retorike të Beogradit vazhdojnë të synojnë audiencën e brendshme serbe, duke e paraqitur veriun e Kosovës si "çështje të hapur".
BurimiRTSH
