Ministri për Evropën dhe Punët e Jashtme, Ferit Hoxha, ka zhvilluar një takim pune me Komisioneren Evropiane për Zgjerimin, Marta Kos, duke u fokusuar te përparimi i procesit të anëtarësimit të Shqipërisë në Bashkimin Evropian. Takimi shërbeu si një platformë për të shqyrtuar ecurinë e negociatave dhe hapat e ardhshëm drejt përmbylljes së tyre, si dhe për të diskutuar zbatimin e Planit të Rritjes për Ballkanin Perëndimor.
Gjatë bisedimeve, palët vlerësuan progresin e arritur pas publikimit të Raportit të Progresit 2026 dhe shqyrtuan udhërrëfyesin e negociatave. Ministri Hoxha theksoi domosdoshmërinë që dinamika aktuale e procesit integrues të përkthehet në hapa konkretë dhe rezultate të matshme, duke theksuar rëndësinë e vijimit të punës me kapitujt e negociatave.
Rëndësia e rezultatateve të matshme
Në një reagim të publikuar në platformën X pas takimit, ministri Hoxha u shpreh se Shqipëria ka ndërtuar një vrull të vërtetë në rrugën e integrimit. "Tani është koha për ta kthyer vrullin në rezultate të matshme, për të vazhduar mbylljen e kapitujve dhe për të transformuar angazhimet në reforma, dhe reformat në anëtarësim," deklaroi ai, duke nënvizuar nevojën për veprim konkret.
Kreu i diplomacisë shqiptare theksoi gjithashtu se koordinimi i ngushtë me institucionet evropiane dhe kryeqytetet e unionit mbetet kyç për të ruajtur ritmin e integrimit. Bashkëpunimi me Komisionin Evropian dhe Shtetet Anëtare të BE-së është thelbësor, ndërsa vendi përshpejton zbatimin e angazhimeve dhe përparon me vendosmëri në fazën e fundit drejt anëtarësimit.
Mbështetja për një proces të besueshëm
Në përfundim të takimit, ministri Hoxha shprehu mirënjohjen e tij për Komisioneren Marta Kos për mbështetjen e vazhdueshme dhe angazhimin e saj. Ai vlerësoi përkushtimin e saj në mbështetjen e një procesi të besueshëm dhe të bazuar në meritë të zgjerimit, i cili forcon si Shqipërinë ashtu edhe Bashkimin Evropian dhe investon në të ardhmen e përbashkët evropiane. Këto bisedime rikonfirmojnë angazhimin e Shqipërisë për të thelluar reformat dhe për të përshpejtuar hapat drejt realizimit të objektivit strategjik të integrimit në BE.
BurimiRTSH



