Sytë e Kosovës dhe të diasporës shqiptare janë drejtuar drejt Hagës këtë të mërkurë, ndërsa Gjykata Speciale pritet të shpallë vendimin për katër ish-krerë të Ushtrisë Çlirimtare të Kosovës: Hashim Thaçin, Kadri Veselin, Jakup Krasniqin dhe Rexhep Selimin. Bëhet fjalë për një nga momentet më të ndjeshme politike dhe historike që lidhen me luftën çlirimtare të Kosovës.
Dhjetëra njerëz kanë mbërritur nga vende të ndryshme të botës për të qëndruar pranë familjeve dhe për të shprehur mbështetjen e tyre ndaj ish-drejtuesve të UÇK-së. Mes tyre janë familjarë të drejtpërdrejtë të të akuzuarve, përfshirë Endrit Thaçin, djalin e Hashim Thaçit.
Incident para hyrjes së gjykatës
Atmosfera jashtë ambienteve të Gjykatës Speciale ka qenë e ngarkuar emocionalisht. Mbështetësit e ish-krerëve të UÇK-së kanë reaguar me ashpërsi ndaj prezencës së një gazetari nga Kosova, duke kërkuar largimin e tij nga vendi i ngjarjes. Sipas të dhënave, arsyeja e këtij reagimi lidhet me qëndrimet që ky gazetar kishte shprehur më parë ndaj figurave të akuzuara.
Për të parandaluar çdo përshkallëzim të situatës, djali i Hashim Thaçit, Endrit Thaçi, u largua nga hyrja kryesore e gjykatës dhe u spostua deri në momentin kur do të lejohet hyrja në ambientet e brendshme të Gjykatës Speciale. Ndërhyrja erdhi si masë parandaluese dhe situata u qetësua pa incidente të mëtejshme.
Thirrjet e mbështetësve dhe pesha e momentit
Jashtë gjykatës, mbështetësit kanë dhënë zë ndjenjave të tyre me thirrje spontane: "O Hashim ti ku je, krejt Kosovën këtu e ke" — fjalë që pasqyrojnë lidhjen e thellë emocionale që shumë kosovarë ruajnë ndaj figurave që drejtuan luftën e çlirimit në fund të viteve '90. Atmosfera ka ngjashmëri me tubimet kombëtare, ku kujtesa e rezistencës kundër agresionit serb mbetet e gjallë.
Hashim Thaçi, Kadri Veseli, Jakup Krasniqi dhe Rexhep Selimi janë katër ish-drejtues të UÇK-së të cilët u akuzuan nga Gjykata Speciale pas vitesh hetimesh. Kjo gjykatë, me seli në Hagë, u ngrit nën presion ndërkombëtar dhe ka ngjallur debate të ashpra në Kosovë, ku shumë e shohin si instrument që rrezikon të kriminalizojë vetë luftën çlirimtare.
Vendimi i Gjykatës Speciale pritet të ketë jehonë të madhe jo vetëm në Kosovë, por edhe në gjithë rajonin shqiptar. Ky moment do të ndikojë drejtpërdrejt mbi mënyrën se si bota juridike ndërkombëtare do të vlerësojë luftën e UÇK-së — një luftë që për popullin shqiptar mbetet simbol i çlirimit dhe i rezistencës ndaj spastrimeve etnike serbe.
Shiko edhe
BurimiEuro news Albania
