Shtatë ndeshje të Kupës së Botës 2026 kanë tërhequr vëmendjen e Grupit të Kopenhagës, organizatës ndërkombëtare që monitoron dhe lufton manipulimin e ndeshjeve sportive nëpërmjet basteve. Rrjeti ka lëshuar alarme të verdha për këto takime, ndërsa FIFA vazhdon të mbajë qëndrim se nuk ka gjetur asnjë provë konkrete për trukime.
Këshilli i Evropës ka bërë publike një përmbledhje të gjetjeve të raportit, menjëherë pas deklaratës së FIFA-s se tregjet e basteve nuk kishin shfaqur lëvizje të dyshimta gjatë turneut. Raporti i plotë i Grupit të Kopenhagës ende nuk është publikuar zyrtarisht, por gjetjet paraprake kanë ngjallur shqetësim në botën e futbollit.
Alarmet e verdha dhe çfarë nënkuptojnë
Sistemi i klasifikimit të Grupit të Kopenhagës përdor tre nivele alarmi: të verdhë, portokalli dhe të kuq, sipas shkallës rritëse të rrezikut. Shtatë ndeshjet e Botërorit 2026 kanë marrë alarmin e verdhë, që shënon dyshim të moderuar — jo provë manipulimi, por tregues që kërkojnë hetim të mëtejshëm. Elementët që shkaktojnë këto alarme përfshijnë luhatje të pazakonta të kuotave të basteve, informacione të pakonfirmuara dhe aktivitet i dyshimtë në platforma bastesh apo rrjete sociale. Grupi i Kopenhagës ka kërkuar zyrtarisht nga FIFA informacion shtesë për rastet e identifikuara.
Ndër rastet që kanë ngritur më shumë pikëpyetje është ai i sulmuesit amerikan Folarin Balogun. Platforma e basteve me kriptomonedha Polymarket kishte hapur një treg disa ditë para ndeshjes së fazës së 1/16 së finales kundër Belgjikës, duke pyetur nëse Balogun do të luante — moment kur zyrtarisht lojtari ishte i pezulluar pas marrjes së kartonit të kuq. Pezullimi u anulua më pas dhe Balogun luajti normalisht. Raporti thekson se një treg i tillë nuk u hap për asnjë nga 14 futbollistët e tjerë të ndëshkuar me karton të kuq gjatë të njëjtit turne, fakt që ka tërhequr vëmendjen e monitoruesve.
Spanja – Kepi i Gjelbër dhe vonesa e VAR-it
Ndeshja mes Spanjës dhe Kepit të Gjelbër në fazën e grupeve, e cila përfundoi 0-0, është gjithashtu pjesë e analizës. Të dhënat tregojnë se në Polymarket u vendosën rreth 4.8 milionë dollarë baste mbi skenarin që Spanja nuk do ta fitonte atë ndeshje — një shumë e pazakontë për një takim të tillë. Po ashtu, monitoruesit kanë shqyrtuar edhe një vonesë prej rreth tre minutash e gjysmë nga sistemi VAR për anulimin e një goli të Ferran Torres gjatë fitores 4-0 të Spanjës ndaj Arabisë Saudite.
Pavarësisht të gjitha sinjaleve, asnjë akuzë përfundimtare nuk është ngritur ndaj lojtarëve, gjyqtarëve apo zyrtarëve. FIFA ka ritheksuar qëndrimin e saj zyrtar: analizat e kryera gjatë dhe pas turneut nuk kanë evidentuar prova të besueshme për manipulim të ndeshjeve. Megjithatë, kërkesat e Grupit të Kopenhagës për bashkëpunim dhe transparencë të shtuar mbeten në tryezë, ndërsa debati publik rreth integritetit të Botërorit 2026 vazhdon të nxehë diskutimet në botën e futbollit.
BurimiTelegrafi Sport
