Kryeministri Edi Rama ndërhyri me një deklaratë të ashpër dhe të drejtpërdrejtë në debatin që po zhvillohet ndërmjet Tiranës dhe Beogradit rreth lumit Ibër, duke riafirmuar qëndrimin e palëkundur të Shqipërisë mbi sovranitetin e Kosovës. Reagimi erdhi pas përplasjeve ndërmjet ministrit të Jashtëm shqiptar, Ferit Hoxha, dhe homologut serb, Marko Gjuriç, të cilat u shtrinë nga çështja e ujit te argumente të njohura të Beogradit për "Shqipërinë e Madhe" dhe statusin e Kosovës.
Rama e cilësoi shkëmbimin mes dy ministrave si "një shkëmbim shumë interesant gjatë verës", duke ironizuar rrugën e diskutimit: nga hidrologjia te e drejta ndërkombëtare, me ndalesë të detyrueshme te lajtmotivi beogradun i "Shqipërisë së Madhe" dhe formulimi "Kosovë dhe Metohi". Kryeministri shqiptar e quajti këtë model argumentimi "folklor politik" imun ndaj kohës.
Kosova është shtet, territori i saj nuk është serb
Në postimin e tij në rrjetin social X, Rama ishte kategorik: Shqipëria nuk ka asnjë pretendim ndaj territorit serb dhe nuk ka nevojë për asnjë "Shqipëri të Madhe" për të mbështetur Kosovën. "Kosova është një shtet më vete. Shqiptarët e Kosovës janë pikërisht kjo: shqiptarë të Kosovës. Ata kanë Republikën e tyre, institucionet e tyre dhe të drejtën e tyre për të përcaktuar të ardhmen e tyre", shkroi ai. Kryeministri theksoi gjithashtu se territori i Republikës së Kosovës dhe burimet natyrore brenda tij nuk mund të pretendohen si pronë e Serbisë, pavarësisht retorikës së Beogradit. "Serbia e humbi Kosovën. Përsëritja e asaj që nuk e humbi ndoshta mund ta kthejë humbjen në fitore në gjeografinë e imagjinatës politike, por hartat janë më pak të përshtatshme", shkroi Rama me ironi të prerë.
Ibri ndjek gjeografinë, jo pikat politike të Beogradit
Sa i takon çështjes konkrete që ndezi debatin — deklaratat e presidentit serb Aleksandar Vuçiç se Serbia mund të devijojë rrjedhën e Ibrit, lumit që furnizon liqenin e Ujmanit në Kosovë — Rama qëndroi i qartë në thelbin juridik. Ibri është sistem ndërkufitar ujor dhe Serbia, edhe nëse ka të drejtë të menaxhojë burimet brenda juridiksionit të saj, nuk mund të pretendojë se pasojat e vendimeve të saj ndalen magjikisht në kufi. "Kjo, në fund të fundit, është arsyeja pse ekziston ligji ndërkombëtar i ujit", argumentoi kryeministri, duke shtuar se "lumenjtë kanë zakonin e papërshtatshëm të ndjekin gjeografinë në vend të pikave diplomatike të diskutimit".
Pavarësisht tonit kritik, Rama nënvizoi se Shqipëria kërkon marrëdhënie të mira me Serbinë dhe dëshiron integrimin e të gjithë rajonit në Bashkimin Evropian, duke përfshirë Serbinë. Megjithatë, ai sqaroi se fqinjësia e mirë nuk do të thotë pranim i versioneve të njëanshme të historisë. Debati vjen në një moment të ndjeshëm, kur çështja e ujit ka kthyer sytë drejt varësisë kritike të Kosovës nga burimet ujore të lumit Ibër — një argument që rrit urgjencën e zgjidhjes politike të qëndrueshme për rajonin.
BurimiRTSH
