Partia Demokratike ka nisur procedurat për ta çuar marrëveshjen konfidenciale ndërmjet Shqipërisë dhe Shteteve të Bashkuara të Amerikës përpara Gjykatës Kushtetuese. Bëhet fjalë për kredinë prej 302 milionë dollarësh të destinuar për blerjen e pajisjeve ushtarake, e cila u ratifikua nga shumica parlamentare brenda një dite dhe pa respektuar, sipas opozitës, afatet dhe procedurat e parashikuara nga Kushtetuta.
Kryetari i grupit parlamentar demokrat, Gazment Bardhi, sqaroi se paralajmërimi i mëparshëm për t'iu drejtuar Kushtetueses nuk kishte qëllim politik, por ishte një tentativë e fundit për të shmangur një procedurë antikushtetuese në një çështje strategjike. "Opozita e mbështet në parim këtë marrëveshje, pasi i shërben interesit kombëtar për modernizimin e Forcave të Armatosura dhe detyrimeve të Shqipërisë si anëtare e NATO-s. Por kjo marrëveshje duhej të ishte model i respektimit të kushtetutës, transparencës dhe debatit parlamentar", deklaroi Bardhi.
Shtatë shkeljet kushtetuese që rendit PD-ja
Sipas dokumentacionit të depozituar nga demokratët, shkelja e parë dhe më themelore ka të bëjë me mohimin e deputetëve për t'u njohur me tekstin e marrëveshjes para votimit — e drejtë kjo e garantuar shprehimisht nga Kushtetuta dhe Rregullorja e Kuvendit. Shkelja e dytë lidhet me mungesën e raportit financiar shoqërues, i cili do të lejonte deputetët të vlerësonin ndikimin e marrëveshjes në buxhetin e shtetit. Shkelja e tretë ka të bëjë me rregullin që rendi i ditës të publikohet të paktën 48 orë përpara seancës: shumica e njoftoi ndryshimin dhe votoi dokumentin brenda të njëjtës ditë, e hënë.
Shkelja e katërt ka lidhje me afatin minimal njëjavor, të cilin vetë Gjykata Kushtetuese e kishte shpallur të detyrueshëm në një vendim të shkurtit të këtij viti, kur rrëzoi procedurën e miratimit të Rregullores së funksionimit të Kuvendit — rast që PD-ja e cilëson identik me atë të kësaj marrëveshjeje. Shkelja e pestë ndërlidhet me justifikimin e urgjencës: qeveria e kishte miratuar marrëveshjen në parim më 19 qershor dhe e kishte nënshkruar më 22 qershor, duke e mbajtur me muaj pa e paraqitur në Kuvend dhe duke krijuar kështu, sipas opozitës, një urgjencë artificiale.
Pasojat juridike dhe debati politik
Shkelja e gjashtë ka të bëjë me të drejtën e një të pestës së deputetëve për të aktivizuar Gjykatën Kushtetuese para ratifikimit të çdo marrëveshjeje ndërkombëtare. Procedura e nxituar e ka privuar praktikisht pakicën parlamentare nga ushtrimi i kësaj kompetence. Ndërsa shkelja e shtatë dhe ndoshta më delikatesja juridikisht ka të bëjë me botimin në Fletoren Zyrtare: duke e mbajtur marrëveshjen sekrete, qeveria e ka bërë të pamundur publikimin e saj, gjë që sipas Kushtetutës bën të parealizueshme edhe hyrjen e saj në fuqi si pjesë e sistemit juridik shqiptar.
Çështja tani do të shqyrtohet nga Gjykata Kushtetuese, e cila do të vendosë nëse procedura e ndjekur nga shumica ka cenuar parimin e demokracisë përfaqësuese. Vendimi i pritshëm mund të ketë pasoja të rëndësishme jo vetëm për këtë marrëveshje specifike, por edhe për mënyrën se si parlamenti shqiptar do të trajtojë në të ardhmen marrëveshjet ndërkombëtare me karakter të ndjeshëm strategjik.
BurimiOpinion.al
