Ministrja e Ekonomisë dhe Inovacionit, Delina Ibrahimaj, ka njoftuar se platforma dixhitale "Pasqyra e Çmimeve" është në fazat e fundit të përgatitjes dhe do të aktivizohet brenda javës së parë të tetorit. Nismën e ka prezantuar si një nga instrumentet kryesore të qeverisë për të rritur transparencën në tregun e mallrave të konsumit të gjerë.
Në një konferencë për shtyp, Ibrahimaj bëri të qartë se platforma, në momentin e nisjes, do të përfshijë të paktën 160 produkte — kryesisht ushqime dhe artikuj higjenike të përditshmërisë — që konsiderohen ndër më të kërkuarat nga familjet shqiptare. "Ne presim që në 10-ditëshin e parë të tetorit platforma të jetë funksionale me një numër minimal prej 160 produktesh. Jemi duke rakorduar me marketet kryesore listën finale të produkteve, e cila do të përbëhet nga produktet kryesore të shportës", deklaroi ministrja.
Çmime fikse për tre muaj, marrëveshje me supermarketet
Paralel me platformën, Ministria e Ekonomisë po finalizon edhe një iniciativë tjetër: një marrëveshje me rrjetin e supermarketeve, importuesve dhe prodhuesve kryesorë, sipas së cilës një sërë produktesh bazë do të tregtohen me çmime fikse dhe fitim minimal për një periudhë tremujore. Ibrahimaj shpjegoi se negociatat me zinxhirët e furnizimit janë në fazë avancuar dhe se lista e saktë e produkteve të prekura po hartohet.
"Jemi duke punuar me rrjetin e supermarketeve, por edhe me importuesit dhe prodhuesit, që janë furnitorët kryesorë të tyre, për të detajuar një listë produktesh për të cilat të gjithë palët kanë rënë dakord t'i tregtojnë me çmime fikse dhe me fitim minimal", sqaroi ajo. Sipas ministres, të dyja nismat — platforma dhe lista e çmimeve fikse — do të jenë operacionale brenda afatit të njëjtë: 10-ditëshi i parë i tetorit.
Transparencë dhe konkurrencë si qëllim kryesor
Synimi i deklaruar i projektit është t'u mundësojë qytetarëve të krahasojnë në kohë reale çmimet e të njëjtit produkt nëpër tregjet e ndryshme, duke i vendosur operatorët ekonomikë nën presion konkurrence. Qeveria shpreson se ekspozimi publik i çmimeve do të frenojë rritjet e pajustifikuara dhe do të kthejë konsumatorin në aktor aktiv të tregut.
Nisma vjen në një kohë kur çmimet e mallrave bazë kanë mbetur ndër shqetësimet kryesore të familjeve shqiptare, pas valës së inflacionit që preku ekonominë vendase gjatë viteve të fundit. Nëse platforma do të funksionojë siç është parashikuar, do të jetë hapi i parë konkret drejt digjitalizimit të monitorimit të tregut të konsumit në Shqipëri.
BurimiRTSH
