Zgjoheni papritur natën, jeni plotësisht të vetëdijshëm, por nuk mund të lëvizni duart, këmbët e as të thërrisni. Ndjeni presion në gjoks ose përshtypjen se dikush ndodhet pranë shtratit. Ky fenomen quhet paralizë e gjumit dhe, edhe pse duket si skenë nga një film tmerri, ekspertët e shpjegojnë si çrregullim kalimtar dhe zakonisht të padëmshëm.
Shkaku qëndron te kalimi midis fazës REM të gjumit dhe zgjimit. Gjatë kësaj faze, muskujt janë natyrshëm të çaktivizuar për të mos i kryer fizikisht lëvizjet e ëndrrave. Kur truri zgjohet përpara se trupi të dalë nga kjo fazë, personi mbetet i vetëdijshëm por pa kontroll muskular. Truri mund të vazhdojë të prodhojë imazhe të ëndrrave edhe me sytë hapur, duke shkaktuar halucinacione si figura njerëzore, hije apo ndjesi préjeje.
Sipas të dhënave shkencore, rreth 40 për qind e njerëzve e përjetojnë këtë gjendje të paktën një herë. Episodet zgjasin zakonisht disa sekonda deri në dy minuta. Faktorët që e rrisin rrezikun përfshijnë mungesën e gjumit, stresin, orarin e çrregullt dhe gjumin në shpinë.
Konsultimi me mjek rekomandohet vetëm nëse episodet përsëriten shpesh, shoqërohen me halucinacione të theksuara ose ndikojnë ndjeshëm në cilësinë e jetës së përditshme.
