Kryeministri Edi Rama hodhi një propozim të fortë gjatë mbledhjes me deputetët dhe ministrat e Partisë Socialiste: çdo ndërhyrje e një parlamentari për vendosjen e dikujt në punë të trajtohet si vepër penale. Deklarata u bë me ton të prerë, duke u shoqëruar me premtimin se Rama vetë do ta sjellë këtë propozim para votimit në parlament.
"Unë do propozoj që çdo ndërhyrje e një deputeti me telefon për të futur njeri në punë të konsiderohet vepër penale. Do e propozoj këtë dhe do ju shoh të gjithëve në sy dhe do ju kërkoj ta votoni. Çdo mesazh i çuar: 'Fut këtë në punë', 'Shih çik atë', të konsiderohet vepër penale", deklaroi kryeministri.
Argumenti i barazisë dhe aksesit tek përfaqësuesi
Rama e arsyetoi propozimin me parimin e përfaqësimit të drejtë. Sipas tij, një deputet që shfrytëzon ndikimin e tij për të favorizuar rrethana familjare ose klanore është tradhtar ndaj qytetarëve që e kanë votuar pa pasur akses tek ai. "Sepse një deputet që bën këtë nuk është i denjë për të qenë përfaqësuesi i mijëra të tjerëve që nuk kanë akses te WhatsApp-i i tij, që nuk janë pjesë e trungut të familjes së tij, që s'janë pjesë e rrënjëve të tarafit të tij dhe që e kanë votuar këtë deputet e në fund shikojnë fëmijën e tyre të parakalohet nga WhatsApp-i i deputetit", u shpreh ai.
Ky formulim, me referencë të drejtpërdrejtë ndaj mesazheve WhatsApp si mjet ndërhyrjeje, synon të nxjerrë në pah karakterin e fshehur dhe joformal të këtij fenomeni të njohur gjerësisht në administratën shqiptare.
Meritokracia si arkitekturë e re shtetërore
Kryeministri e zgjeroi diskutimin edhe te nevoja për ndërtimin e një sistemi të bazuar në meritë, ku karriera profesionale të jetë e pavarur nga ndërrimi i pushtetit. Ai iu referua konceptit të "Shkallës së Meritës" si instrument për t'i dhënë grade profesionale statusin e një aseti personal të punonjësit.
"Shkalla e meritës duhet të krijojë një arkitekturë shumë të qartë, ku grada të bëhet pasuri profesionale e njeriut, jo pronë e postit që mban sot apo e qeverisë që vjen nesër", theksoi Rama.
Kryeministri shtoi se shteti duhet të komunikojë tek qytetarët mundësinë reale për karrierë, jo thjesht të synojë bindjen e tyre: "Ne duhet të krijojmë një sistem që të jetë në gjendje ta komunikojë shtetin te besimi në karrierë", tha ai. Propozimi për kriminalizimin e ndërhyrjeve parlamentare pritet të ngjallë debat të gjerë, pasi prek një praktikë të rrënjosur thellë në kulturën politike shqiptare dhe do të kërkojë ndryshime konkrete në Kodin Penal.
BurimiRTSH
