Vala e të nxehtit vijon të mbajë nën ndikimin e saj vendin tonë, me temperaturat që pritet të mbeten të larta edhe gjatë ditëve në vijim.Sinoptikanët parashikojnë mot kryesisht të kthjellët, ndërsa në zonat e ulëta dhe bregdet temperaturat mund të arrijnë deri në 39-40 gradë Celsius, duke përjetuar edhe ato që quhen ‘netë tropikale’.
“Masat ajrore të nxehta që prej ditësh kanë përfshirë vendin tonë do të na shoqërojnë jo vetëm për fundjavën, por edhe javën që kemi përpara. Moti parashikohet kryesisht i kthjellët në pjesën më të madhe të territorit dhe vranësira të pakta në relievet malore të vendit. Era do të jetë kryesisht nga kuadrati i veriut, 5-6 metra për sekondë dhe herë pas here përgjatë vijës bregdetare pritet të shkojë në 10 metra për sekondë.Temperaturat pritet që të jenë të larta. Në këto momente, në Kuçovë ka shënuar 38 gradë, ndërsa në Tiranë 37 gradë. Temperaturat pritet që në zonat e ulëta dhe në bregdet të shkojnë në 39 deri në 40 gradë. Jashtë, në ambiente të hapura, temperaturat do të ndihen edhe më të larta, për shkak edhe të prezencës së lagështirës në ajër. Do të përjetojmë edhe ato që quhen net tropikale, ku termometri edhe në orët e natës nuk do të zbresë poshtë 25 ose 26 gradë”, u shpreh sinoptikania Besa Sherollari nga SHMU !
