Ish-presidenti Ilir Meta u paraqit sot para Gjykatës së Posaçme Kundër Korrupsionit dhe Krimit të Organizuar, ku hodhi poshtë me forcë akuzat se ka ndërhyrë në favor të biznesmenin Ardian Shatku lidhur me hyrjen e tij në tregun e fibrave optike dhe nënshkrimin e marrëveshjes së interkonjeksionit midis kompanisë "UNIFI Communication INC" dhe një operatori celular shqiptar. Meta e cilësoi të absurde çdo pretendim të tillë dhe e paraqiti çështjen si pjesë e një fushate politike të orkestruar kundër tij.
Meta: Arrestimi im u bazua në dokumente të falsifikuara
Duke folur drejtpërdrejt para gjyqtarëve, Meta deklaroi se ndalimi i tij më 21 tetor 2024 u realizua vetëm mbi bazën e një letërporosie të falsifikuar nga Departamenti amerikan i Shtetit dhe se nuk kishte asnjë lidhje me strukturën GSIS. Ai shtoi se ish-shefi i kundërspiunazhit amerikan, Charles McGonigal — i dënuar tashmë në Shtetet e Bashkuara — është i përfshirë drejtpërdrejt në hetimet ndaj tij, duke cituar vendime të gjykatave amerikane që verifikojnë një takim të paligjshëm të McGonigal-it me kryeministrin Edi Rama, gjatë të cilit ky i fundit do të ketë paguar 80 mijë dollarë.
Sipas Metës, McGonigal, pasi u largua nga detyra, ka kaluar nëpër Kosovë ku edhe atje ka lënë gjurmë hetimore, ndërsa para takimit me Ramën kishte qëndruar në Vjenë. Aty, sipas tij, McGonigal është takuar me ish-senatorin Tom Doshi, dhe në atë takim dyshohet se ka qenë i pranishëm edhe Durim Bami. Meta shtoi se Doshi është i përfshirë edhe në çështjen CEZ-DIA dhe se qëllimi i atyre veprimeve ishte, siç pretendoi ai, grabja e 86 mandateve parlamentare para zgjedhjeve.
"Po ta dija çfarë kërkonte Shatku, do të ndryshonim ligjin"
Lidhur me akuzën qendrore të çështjes, Meta sqaroi se nuk ka pasur kurrfarë dijenie apo interesi për projektin e Ardian Shatkut. Megjithatë, ai shtoi se nëse do ta kishte ditur se Shatku po kërkonte heqjen e monopolit dhe hapjen e tregut ndaj të gjithë operatorëve, do ta kishte mbështetur nismën nëpërmjet rrugës ligjore në Parlament — pa pasur nevojë të merrej me persona si Haxhinasto apo Ermal Stopalli. "Unë kam qenë dhe jam kundër monopoleve dhe këtë gjë do ta kisha zgjidhur me ligj", deklaroi Meta, duke nënvizuar se një iniciativë e tillë do të ishte transparente dhe në interes publik.
Meta e mbyll deklaratën e tij duke akuzuar kundërshtarët politikë se e mbajnë opinionin publik nën presion me dezinformata, duke e paraqitur gjithë procedurën penale si instrument i pushtetit aktual. Procesi gjyqësor ndaj tij vijon, ndërsa deklaratat e sotme pritet të analizohen nga mbrojtja dhe prokuroria në seancat e ardhshme.
BurimiJava News
