Lidhja Demokratike e Kosovës (LDK) ka vendosur të tërhiqet plotësisht nga çdo marrëveshje me kryeministrin Albin Kurti për pjesëmarrje në qeveri. Kryetari i partisë, Lumir Abdixhiku, bëri publik këtë qëndrim pas mbledhjes së grupit parlamentar të LDK-së, duke sqaruar se partia do të vijojë rrugën e opozitës.
Abdixhiku nënvizoi se LDK-ja ka hedhur poshtë të gjitha ofertat që i ishin bërë në kuadër të bisedimeve për formimin e institucioneve të reja. Midis tyre, kryesimi i Kuvendit të Kosovës, tri postet ministrore të propozuara gjatë takimeve me Kurtin, si dhe posti i Presidentit të Republikës.
LDK: Zhgënjim, por jo bllokadë
Pavarësisht vendimit për të qëndruar jashtë qeverisë, Abdixhiku bëri të qartë se partia e tij nuk do ta shndërronte qëndrimin e saj në pengesë institucionale. "Pavarësisht këtij qëndrimi, LDK-ja s'do ta shndërrojë zhgënjimin politik në bllokadë. Jemi të gatshëm të bisedojmë për zgjidhjen e një presidenti që mbron interesat e Republikës", deklaroi ai.
Sipas kryetarit të LDK-së, prioritet mbetet dalja nga ngërçi aktual nëpërmjet zgjedhjes së një presidenti konsensual. "Kemi hequr dorë nga të gjitha postet. Ne mbështesim krijimin e institucioneve dhe zgjedhjen e një presidenti konsensual për ta zhbllokuar krizën", u shpreh Abdixhiku.
Kosova në krizë institucionale
Deklarata e LDK-së vjen në një moment tepër delikat për Kosovën, e cila po përballet me një bllokadë të thellë politike dhe institucionale. Konstituimi i Kuvendit të ri, zgjedhja e Presidentit dhe formimi i qeverisë mbeten ende të pazgjidhura, duke e lënë vendin pa institucione të plota funksionale.
Vendimi i LDK-së për të qëndruar në opozitë e ndërlikon edhe më tej ekuacionin parlamentar të Kurtit, i cili duhet të gjejë mbështetje të mjaftueshme për të siguruar shumicën e nevojshme. Sfida kryesore mbetet akoma zgjedhja e Presidentit, post që kërkon konsensus të gjerë mes forcave politike. LDK-ja, ndonëse jashtë qeverisë, ka lënë të hapur dyert për dialog mbi këtë çështje, duke u pozicionuar si faktor me ndikim, por jo si pjesë e ekzekutivit.
BurimiRTSH
