Ministria e Drejtësisë së Kosovës ka ndërmarrë hap konkret juridik ndaj Snezhana Paunoviq, ministre e Administratës Publike dhe Vetëqeverisjes Lokale në qeverinë e Serbisë, pasi ajo deklaroi publikisht se, po të kishte qenë në pozitën e Sllobodan Millosheviqit në vitin 1998, do ta kishte spastruar etnikisht Kosovën. Ministrja kosovare e Drejtësisë në detyrë, Donika Gërvalla, njoftoi se ka dorëzuar kallëzim penal dhe ka kërkuar nga Zyra e Kryeprokurorit të Shtetit të ndërmarrë të gjitha veprimet hetimore të nevojshme, duke proceduar tutje me aktakuzë e kërkesë për dënim.
Gërvalla theksoi se deklarata e tilla nuk mund të trajtohen si retorikë e zakonshme politike. "Nuk ka hapësirë për glorifikimin e spastrimit etnik, relativizimin e gjenocidit e krimeve monstruoze serbe dhe përhapjen e narrativave që synojnë cenimin e paqes, sigurisë dhe bashkëjetesës ndëretnike si dhe nxitjen e urrejtjes. Deklaratat publike që synojnë të justifikojnë spastrimin etnik dhe dëbimin e një populli nuk mund të trajtohen si retorikë e zakonshme politike. Ato mbajnë pasoja të rënda historike, juridike e njerëzore", shkroi Gërvalla në rrjetet sociale.
Reagime nga Kosova, Serbia dhe Bashkimi Evropian
Deklarata e Paunoviqit ngjalli valë të gjerë indinjate, jo vetëm në Kosovë, por edhe brenda vetë Serbisë. Deputeti i vetëm shqiptar në parlamentin serb, Shaip Kamberi, me mbështetjen e 53 deputetëve, ka dorëzuar te kryeministri serb kërkesën zyrtare për shkarkimin e saj nga detyra. Kamberi vlerëson se qëndrime të tilla nuk kanë vend në asnjë institucion shtetëror.
Bashkimi Evropian, nga ana e tij, ka bërë thirrje të qartë ndaj politikanëve serbë për t'u përmbajtur nga deklarata nxitëse dhe për të respektuar detyrimet e marra në kuadër të procesit të normalizimit të marrëdhënieve me Kosovën. Komisionarja e BE-së për Zgjerim, Marta Kos, shkoi edhe më larg, duke thënë se është e paimagjinueshme që Paunoviq të vazhdojë të mbajë postin e ministres pas këtyre deklaratave.
Konteksti historik dhe pasojat politike
Deklarata e Paunoviq vjen në një moment kur tensionet midis Kosovës dhe Serbisë mbeten të larta dhe kur procesi i dialogut ndërmjet dy vendeve po kalon nëpër një fazë të brishtë. Të evokosh figurën e Millosheviqit si model pozitiv është jo vetëm fyerje ndaj popullit kosovar, por edhe ndaj viktimave të masakrave serbe të viteve 1998-1999, si ato të Reçakut, Suharekës dhe Krushës së Vogël.
Kallëzimi penal i Kosovës shënon një hap të paprecedentë në tentativën për t'i dhënë pasoja juridike retorikës politike armiqësore nga Beogradi. Nëse prokuroria kosovare do të procedojë me aktakuzë, rasti mund të fitojë edhe dimensione ndërkombëtare, duke vënë nën presion sërish Serbinë para partnerëve të saj evropianë. Sytë mbeten drejtuar tek reagimi i kryeministrit serb dhe vendimi nëse Paunoviq do të qëndrojë apo do të largohet nga kabineti qeveritar.
Shiko edhe
BurimiKoha
