Dita e tretë e protestave në Tiranë, e nisur në mëngjesin e 15 tetorit në orën 09:00, shënoi ngjarjet më të dhunshme deri tani. Protestues të maskuar hodhën gurë, tulla dhe fishekzjarrë në drejtim të ndërtesave shtetërore dhe efektivëve të Policisë, duke shkaktuar dëme të konsiderueshme materiale në institucione publike, banka dhe biznese të shumta të kryeqytetit. Nga incidentet e shënuara gjatë gjithë ditës, 26 persona mbetën të lënduar, ndërsa dy policë — një nga Durrësi dhe një nga Shkodra — u dërguan në spital.
Tubimi filloi pranë Ministrisë së Arsimit, ku protestuesit shkulën gardhet metalike dhe goditën me gurë fasadën e godinës. Kulmi i përplasjeve u arrit pranë Kryeministrisë, ku tensionet zgjatën rreth një orë e gjysmë. Për të shpërndarë turmën, Policia përdori gaz lotsjellës dhe autobotë me ujë. Më pas valët e protestuesve u zhvendosën drejt Kuvendit, Ministrisë së Infrastrukturës — ku u thyen xhamat — dhe Ministrisë së Mjedisit. Ministria e Ekonomisë u godit më rëndë: protestuesit jo vetëm dëmtuan godinën, por i vunë edhe zjarrin.
Biznese të plaçkitura, banka të sulmuar
Përgjatë Rrugës së Durrësit, disa biznese u dëmtuan gjatë kalimit të turmës. Pranë Muzeut Historik Kombëtar, protestuesit thyen vitrinën e një dyqani, hynë brenda, dëmtuan ambientet dhe morën një fikëse zjarri të cilën e hodhen në mes të materialeve në flakë në rrugë. U dogjën gjithashtu kioska dhe kabina rojesh në zona të ndryshme të kryeqytetit, përfshirë atë pranë Agjencisë së Sigurisë Kibernetike dhe atë pranë Ambasadës Amerikane në Tiranë.
Të paktën katër banka të nivelit të dytë u goditën në zona të ndryshme të Tiranës. Protestuesit thyen dyer e xhama, dëmtuan hyrjet dhe fasadat, ndërsa në një rast hynë brenda degës bankare dhe nxorën jashtë dosje e dokumente. Një bankomat u shkatërrua tërësisht. Sulme pati edhe ndaj dyqaneve të dy operatorëve telefonikë si dhe ndaj Bashkisë së Tiranës dhe selisë së Partisë Socialiste, në drejtim të të cilave u hodhën gurë dhe fishekzjarrë.
Rama: dorëheqje nuk do të ketë
Gjatë orëve të vona të mbrëmjes, grupe protestuesish u rikthyen pranë Kryeministrisë dhe sulmuan sërish Ministrinë e Brendshme dhe Ministrinë e Ekonomisë. Kryeministri Edi Rama, në një reagim për agjencitë ndërkombëtare të lajmeve, e përjashtoi kategorikisht mundësinë e dorëheqjes, duke theksuar se ndryshimet e qeverisë bëhen përmes votës demokratike dhe jo nëpërmjet dhunës. Rama u shpreh njëkohësisht i hapur për dialog me studentët dhe për trajtimin e kërkesave të tyre legjitime.
Situata mbetet e tensionuar në kryeqytet. Reagimet ndërkombëtare nuk kanë munguar: OSBE-ja ka bërë thirrje për përmbajtje nga të gjitha palët, duke nënvizuar se dhuna është e papajtueshme me vlerat demokratike. Zhvillimet e ditëve në vijim do të tregojnë nëse tensionet do të qetësohen apo do të vazhdojnë të përshkallëzohen.
BurimiGazeta Expres
