Karim Adeyemi ka bërë hapin e madh drejt Barcelonës, por transferimi i sulmuesit 24-vjeçar vjen i shoqëruar me debate të forta nga bota futbollistike gjermane. Shumë analistë dhe media në Gjermani dyshojnë nëse lojtari do të arrijë ndonjëherë të shfrytëzojë plotësisht potencialin që ka demonstruar vetëm në mënyrë të fragmentuar gjatë viteve te Borussia Dortmund.
Gjatë qëndrimit te klubi i Ruhr-it, Adeyemi u tregua i aftë të vendosë ndeshje i vetëm falë shpejtësisë dhe teknikes individuale, por kurrë nuk arriti të imponohej si titullar i padiskutueshëm. Asnjë trajner nuk e shndërroi atë në lider të skuadrës, ndërsa edhe në kombëtaren gjermane mbeti figurë periferike. Tabloja Bild e karakterizoi si një "bombë me sahat" — me shumë potencial, por të paeksploruar.
Polemika brenda dhe jashtë fushës
Problemi i Adeyemit, sipas vlerësimeve të brendshme të Dortmundit, nuk ka qenë mungesa e talentit por disiplina, fokusin dhe qëndrueshmëria mendore. Periudha të gjata nën pritshmëri alternoheshin me brilanca individuale, duke lënë trajnerët në huti se si ta menaxhonin.
Edhe jashtë fushës, sulmuesi ka qenë shpesh në qendër të mediave. Marrëdhënia e tij me reperen Loredana dhe debatet rreth stilit të jetesës e kanë ndikuar negativisht imazhin e tij publik. Rasti më i komentuar mbetet ai i të ashtuquajturës "Kutia Misterioze": Adeyemi u gjobit me 450 mijë euro pasi një pako e porositur në internet rezultoi të përmbante sende të ndaluara, mes tyre doreza metalike dhe një pajisje elektroshoku. Lojtari pretendoi se nuk kishte dijeni për përmbajtjen, por gjoba u aplikua gjithsesi.
Flick dhe shpresa e rigjenerimit
Megjithatë, Barcelona nuk ka humbur besimin. Faktori kyç në vendimin e katalanasve është trajneri Hansi Flick, i cili e njeh mirë Adeyemin dhe gëzon reputacionin e një tekniku që di të nxjerrë maksimumen nga futbollistët me potencial të paplotësuar.
Edhe Niko Kovac, ish-trajneri i Dortmundit, ka mbetur konsistent në mbështetjen ndaj sulmuesit: "Më pëlqen shumë si person. Është një djalë fantastik dhe besoj se mund të bëhet futbollist i jashtëzakonshëm nëse punon me disiplinë dhe e shfrytëzon çdo stërvitje deri në fund", deklaroi gjermani.
Camp Nou mund të jetë pikërisht ambienti që i nevojitej Adeyemit për t'u rilindur. Barcelona shpreson të shohë versionin më të mirë të tij — atë të shpejtësisë dhe gëzimit të fushës — jo atë të luhatjeve dhe humbjeve të fokusit. Sezoni i ardhshëm do të jetë testi i vërtetë nëse transferimi do të konsiderohet sukses apo gabim i shtrenjtë.
Shiko edhe
BurimiTelegrafi Sport
