Situata e zjarreve në Shqipëri mbetet shqetësuese në disa qarqe të vendit. Sipas të dhënave të fundit të Ministrisë së Mbrojtjes, deri në orën 20:00 janë regjistruar 38 vatra zjarri në total. Prej tyre, 14 janë ende aktive, 2 janë në fazë monitorimi dhe 2 janë vënë plotësisht nën kontroll, ndërkohë që 18 vatra vijojnë të jenë nën ndjekje nga forcat operacionale.
Gurë-Lurë dhe Elbasan, vatrat më shqetësuese
Qarku i Dibrës paraqet situatën më të vështirë. Në zonën e Gurë-Lurës, zjarri po avancon në dy drejtime, por forcat e angazhuara kanë arritur të mbrojnë perimetrin afër banesave, duke shmangur rrezikun e drejtpërdrejtë ndaj tyre. Në terren operojnë 120 forca bashkiake, 57 efektivë të Forcave të Armatosura, 15 punonjës policie, 15 vullnetarë dhe 9 specialistë të Agjencisë së Zonjave dhe Mbrojtjes (ADZM), të mbështetur nga dy avionë Air Tractor. Ndërhyrje paralele vijojnë edhe në Qafën e Helmes, ku janë vendosur forca nga Mbrojtja Civile dhe njësia administrative Selishtë.
Në zonën Priskë e Madhe–Gurrë–Farkë–Lundër, afër Tiranës, operacionet tokësore të Mbrojtjes Civile dhe ADZM-së kombinohen me mbështetjen ajrore të Forcave të Armatosura. Autoritetet sqarojnë se, pavarësisht terrenit malor dhe vështirësive të lëvizjes, nuk ka rrezik të afërt për zonat e banuara.
Në Lugaxhi të Elbasanit, flakët janë përhapur në kurorat e pishave, duke kërkuar mobilizim të gjerë. Në operacion janë Mbrojtja Civile, shërbimet pyjore, Agjencia Shtetërore e Pyjeve dhe 30 vullnetarë, me mbështetje nga Forcat e Armatosura. As këtu nuk raportohet rrezik për banesat.
Përmirësim në Krujë, situata nën kontroll në disa zona
Lajme më të mira vijnë nga Kruja. Në fshatin Abaze, ndërhyrja e koordinuar e forcave operacionale dhe e Forcave të Armatosura, e mbështetur me helikopter, ka mundësuar vendosjen e zjarrit nën kontroll. Në Bojë, Krastë dhe Halil nuk raportohen më vatra aktive. Gjithashtu, në Finiq të Gjirokastrës, vatrat e Dhivrit dhe Rumanxës janë shuar plotësisht, ndërkohë që ajo e Dhrovjanit është nën kontroll. Në Moravë të Devollit, Mbrojtja Civile ka arritur të stabilizojë situatën.
Operacione vijuese zhvillohen edhe në Nëmerçkë dhe Dhëmbel të Përmetit, si dhe në Trojë të Mirditës, ku 30 efektivë shtesë të Forcave të Armatosura janë shtuar në operacion. Në Rrencë dhe Goraj-Budishtë të Shkodrës, puna për izolimin e plotë të vatrave vazhdon, me shenja inkurajuese se situata po stabilizohet.
Përgjigja shtetërore ndaj kësaj vale zjarreve është e gjerë: vetëm nga Forcat e Armatosura janë angazhuar 309 efektivë, 22 mjete, tre helikopterë, dy avionë Air Tractor dhe nëntë mjete zjarrfikëse. Agjencia Kombëtare e Mbrojtjes Civile vijon koordinimin e punës me prefekturat dhe bashkitë në të gjithë territorin. Vala e nxehtësisë dhe era e fortë mbeten faktorët kryesorë që e komplikojnë punën e forcave të zjarrfikësit.
BurimiRTSH
