Presidenti serb Aleksandar Vuçiq ka dalë hapur në mbrojtje të Milan Radoiçiqit, ish-kreut të Listës Serbe, duke pretenduar se ndjekja penale ndaj tij nuk ka të bëjë me vepra kriminale, por me qëndrimin e tij ndaj çështjes së Kosovës. Sipas Koha.net, Vuçiq e paraqiti Radoiçiqin si viktimë të një procesi të motivuar politikisht.
Radoiçiq është personi që pranoi publikisht organizimin e sulmit të armatosur në Banjskë të Kosovës në shtator 2023, ku u vra një polic kosovar. Ai dha dorëheqjen nga kryesia e Listës Serbe pas ngjarjes, por Serbia nuk ka ndërmarrë asnjë veprim real për ta vënë para drejtësisë.
Deklarata e Vuçiqit vjen ndërkohë që Kosova dhe bashkësia ndërkombëtare kërkojnë llogaridhënie për sulmin e Banjskës, i cili u cilësua si akt terrorist dhe agresion i drejtpërdrejtë ndaj shtetit kosovar. Mbrojtja e hapur e Beogradit ndaj Radoiçiqit rëndon më tej marrëdhëniet dypalëshe dhe ecurinë e dialogut Kosovë-Serbi.
