Presidenti serb Aleksandar Vuçiq ndërhyri edhe një herë në mbrojtje të Milan Radoiçiqit dhe Zvonko Veselinoviqit, pasi të dy u panë bashkë në Beograd. Sipas Telegafit, Vuçiq minimizoi akuzat ndaj tyre dhe vuri në dyshim bazën ligjore të çdo ndjekjeje penale.
Kur u pyet nëse anëtarë aktivë të Xhandarmërisë serbe po sigurojnë mbrojtje personale për dy figurat e kontestuara, Vuçiq tha se nuk ka asnjë informacion të tillë. Në të njëjtën kohë, ai pretendoi se Radoiçiqi nuk ndiqet penalisht për vepra kriminale, duke e paraqitur kësisoj si të pafajshëm.
Milan Radoiçiq është ndër figurat kryesore të akuzuara për organizimin e sulmit të armatosur në Banjskë të Kosovës në shtator 2023, sulm që u kujtua si një nga aktet më të rënda destabilizuese ndaj Kosovës. Vuçiq, edhe pse kishte distancuar veten formalisht pas asaj ngjarjeje, ka vazhduar t'i japë mbështetje indirekte Radoiçiqit.
Qëndrimi i presidentit serb konfirmon edhe një herë se Beogradi nuk ka ndërmend të bashkëpunojë seriozisht me drejtësinë ndërkombëtare lidhur me ngjarjet e Banjskës.
