Presidenti i Serbisë, Aleksandar Vuçiç, ka lëshuar një kërcënim të rëndë ndaj Kosovës, duke paralajmëruar se Beogradi po shqyrton mundësinë e ndërhyrjes në rrjedhën e lumit Ibër. Deklarata u bë e njohur nëpërmjet mediave në Beograd dhe u konsiderua menjëherë si një nga ndërhyrjet më ekstreme retorike të kreut të shtetit serb ndaj shtetit të pavarur të Kosovës.
Vuçiç pretendoi se ky veprim do të ishte kundërpërgjigje ndaj atyre që ai cilësoi si masa të autoriteteve të Prishtinës kundër popullsisë serbe në Kosovë. Presidenti serb nënvizoi se janë ftuar tashmë specialistë të fushës për të vlerësuar realizueshmërinë e planit. "Ne kemi ftuar tashmë ekspertë që merren me këtë — sektorin e ndërtimit, inxhinierët dhe të gjithë të tjerët… Ata po e keqtrajtojnë kaq shumë popullin tonë. Le të shohim çfarë do të bëjnë shqiptarët dhe si do të sillen pas këtij veprimi", deklaroi Vuçiç.
Liqeni i Ujmanit — nyja jetike e Kosovës
Paralajmërimi i Beogradit nuk mund të konsiderohet si retorikë boshe, pasi lumi Ibër dhe liqeni artificial i Ujmanit, i krijuar nga diga e tij, përbëjnë një ndër burimet më kritike të infrastrukturës së Kosovës. Ky rezervuar ujor siguron furnizimin me ujë të pijshëm për një pjesë të konsiderueshme të popullsisë së vendit, ndërkohë që kontribuon edhe në prodhimin e energjisë elektrike. Çdo ndërhyrje artificiale në rrjedhën e ujit do të kishte pasoja serioze humanitare dhe ekonomike për qytetarët e Kosovës.
Megjithëse Vuçiç nuk ofroi detaje teknike dhe nuk konfirmoi nëse ky plan do të kalojë nga fjala në veprim, vetë paralajmërimi ka ngjallur shqetësim të thellë. Ekspertët ndërkombëtarë të ujërave dhe sigurisë rajonale e vlerësojnë çdo manipulim të qëllimshëm të rrjedhave ndërkufitare si shkelje flagrante të së drejtës ndërkombëtare dhe normave mjedisore të Bashkimit Europian.
Presion i ri ndaj Prishtinës
Deklarata e Vuçiçit vjen në një kontekst tensionesh të vazhdueshme mes Beogradit dhe Prishtinës, ku Serbia refuzon të njohë pavarësinë e Kosovës dhe vazhdimisht kërkon levë presioni ndaj institucioneve kosovare. Kërcënimi me infrastrukturën ujore shënon një eskalim të ri të gjuhës armiqësore serbe ndaj Kosovës, duke kaluar nga debati politik në fushën e çantazhit strategjik me burime jetike.
Autoritetet e Kosovës nuk kanë reaguar zyrtarisht deri në momentin e publikimit të këtij artikulli, ndërkohë që pritet që çështja të ngrihet edhe në nivel ndërkombëtar. Bashkimi Europian dhe partnerët perëndimorë të Prishtinës do të vihen nën presion për të adresuar hapur këtë lloj kërcënimi, i cili prek sigurinë e një shteti sovran anëtar i proceseve të integrimit europian.
BurimiEuro news Albania
