Misioni i NATO-s në Kosovë nuk është autoriteti kompetent për të vendosur nëse ura kryesore mbi lumin Ibër — lidhja ndërmjet Mitrovicës së Jugut me shumicë shqiptare dhe Mitrovicës së Veriut me shumicë serbe — duhet të hapet plotësisht për qarkullim automjetesh. Këtë e sqaroi të martën admirali amerikan George Wikoff, komandant i Komandës së Forcave të Përbashkëta të NATO-s në Napoli, duke theksuar se vendimi final i takon Kosovës dhe Bashkimit Evropian.
"Vendimet lidhur me praninë e KFOR-it në urën e Mitrovicës bazohen në vlerësimin që ne ia bëjmë gjendjes së sigurisë", deklaroi Wikoff, duke lënë të qartë se misioni ka rol teknik operacional, jo politik. KFOR-i njoftoi njëkohësisht se është në proces kufizimi të pranisë së trupave mbi urë dhe kalimi i përgjegjësive të sigurisë tek Policia e Kosovës — një hap që NATO-ja e cilëson si pjesë e optimizimit të misionit pas përmirësimit të gjendjes së sigurisë në vend.
Ura e bllokuar që nga lufta e vitit 1999
Ura mbi Ibër ka qenë e bllokuar për automjete që prej përfundimit të luftës çlirimtare të vitit 1999, kur agresioni serb ndaj popullatës shqiptare u ndal nga ndërhyrja humanitare e NATO-s. Që atëherë, zona ka qenë vatër e tensioneve etnike dhe KFOR-i e ka mbajtur nën mbikëqyrje të vazhdueshme. Autoritetet kosovare ndërtuan ndërkohë dy ura shtesë pranë asaj kryesorës — një për këmbësorë dhe një për automjete — me qëllim lehtësimin e lëvizjes ndërmjet dy pjesëve të qytetit.
Kryeministri në detyrë Albin Kurti e ka cilësuar si "absurde" faktin që ura kryesore mbetet e mbyllur, duke kërkuar vazhdimisht hapjen e saj të plotë. Tensionet u shtuan edhe më tej kur, fundjavën e kaluar, një takim i planifikuar mes Kurtit dhe komandantit të KFOR-it, Ozkan Ulutash, nuk u realizua "për shkak të rrethanave të paparashikuara", sipas njoftimit zyrtar të misionit.
Serbia kundërshton, Kosova kërkon llogari
Beogradi i ka kundërshtuar ashpër planet e KFOR-it. Presidenti serb Aleksandar Vuçiç i dërgoi një letër shefit të NATO-s, Mark Rutte, duke i kërkuar ndaljen e procesit. Vuçiqi pretendoi se tërheqja e trupave nga ura do të "krijonte kushte për një përballje përfundimtare me popullsinë serbe" në veri të Kosovës. Ministrja në detyrë i Mbrojtjes i Kosovës, Ejup Maqedonci, e hodhi poshtë këtë qëndrim, duke theksuar se përpjekjet e Serbisë për ta paraqitur situatën si kërcënuese nuk përputhen aspak me realitetin faktik në terren.
Bashkimi Evropian, nga ana e tij, ka kërkuar koordinim ndërmjet komunave të prekura dhe institucioneve qendrore të Kosovës, duke theksuar se Policia e Kosovës duhet të garantojë sigurinë e të gjitha komuniteteve, në përputhje me parimet demokratike dhe sundimin e ligjit. Zhvillimi i kësaj situate do të ndikojë drejtpërdrejt edhe në dinamikat e dialogut Kosovë-Serbi, i mbikëqyrur nga Bashkimi Evropian, si dhe në procesin e integrimit evropian të Kosovës.
BurimiEuro news Albania
