Sektori i ndërtimit vazhdon të jetë një nga shtyllat kryesore të të ardhurave për bashkitë shqiptare. Gjatë gjashtëmujorit të parë të vitit 2026, bashkitë e vendit arkëtuan gjithsej rreth 18.3 miliardë lekë nga taksa e ndikimit në infrastrukturë — një rritje prej 12.2 miliardë lekësh krahasuar me të njëjtën periudhë të vitit 2025. Të dhënat vijnë nga Ministria e Financave dhe pasqyrojnë një aktivitet të shtuar në tregun e ndërtimit në të gjithë vendin.
Bashkia e Tiranës renditet e para me diferencë të madhe: vetëm kryeqyteti kontribuoi me 12.4 miliardë lekë, ose 67.7 për qind të të gjitha arkëtimeve kombëtare nga kjo taksë. Krahasuar me gjashtëmujorin e parë të vitit 2025, Tirana shënoi një rritje prej rreth 9.8 miliardë lekësh — një kërcim i jashtëzakonshëm që tregon intensitetin e proceseve të ndërtimit në kryeqytet.
Himara, Saranda dhe Durrësi pas Tiranës
Pas Tiranës, në vendin e dytë qëndron Himara me 1.2 miliardë lekë të ardhura nga kjo taksë. Bashkia bregdetare e jugut tregon kështu rëndësinë e saj si destinacion investimesh dhe ndërtimi. Pas saj renditen Saranda, Durrësi, Shkodra, Lezha dhe Kavaja, të cilat plotësojnë listën e bashkive kryesore arkëtuese për këtë periudhë.
Rritja e mprehtë e arkëtimeve në 2026 shpjegohet edhe nga performanca e dobët e vitit të kaluar. Gjatë vitit 2025, të ardhurat nga kjo taksë kishin rënë nën parashikimet fillestare, veçanërisht në Tiranë. Analisti financiar vërejnë se ky ngadalësim i vitit të kaluar mund të ketë qenë pasojë e vonimit të procesit të dhënies së lejeve të ndërtimit dhe e procedurave administrative të aplikimit.
Lejet e mbartura, faktori kyç i rritjes
Ekspertët vlerësojnë se rritja e konsiderueshme e 2026-ës lidhet kryesisht me realizimin e pagesave për lejet e ndërtimit të mbartura nga viti i mëparshëm. Me rifillimin e procedurave dhe miratimin e lejeve të bllokuara, kompanitë ndërtuese kryen pagesat përkatëse, duke i fryrë arkave bashkiake shuma të konsiderueshme brenda një periudhe relativisht të shkurtër.
Ky trend konfirmon pozicionin e ndërtimit si sektor ndër më dinamikët të ekonomisë shqiptare, pavarësisht luhatjeve të herëpashershme. Për bashkitë, kjo taksë përbën një burim të rëndësishëm financiar që financon investimet në infrastrukturën lokale. Nëse ritmi i ndërtimit dhe i dhënies së lejeve do të mbetet i lartë, pritshmëritë janë që edhe gjashtëmujori i dytë i vitit 2026 të sjellë shifra të mira për buxhetet vendore.
BurimiRTSH
