Pak më shumë se një muaj ka mbetur deri në fillimin e Sunny Hill Festival 2026, njërit prej ngjarjeve muzikore më të mëdha në rajonin e Ballkanit. Edicioni i këtij viti do të zhvillohet më 31 korrik, 1 dhe 2 gusht në Bernicë të Prishtinës, duke grumbulluar fansat e muzikës nga e gjithë rajoni.
Emri më i rëndësishëm i programit të sivjetshëm është Katy Perry, superyllja me famë botërore, e cila do të ngjitet për herë të parë në skenë në Kosovë. Prania e saj shënon një moment historik për festivalin, por edhe për skenën muzikore kosovare në tërësi.
Krahas artistes amerikane, festivali pritet të sjellë edhe emra të tjerë nga skena ndërkombëtare dhe ajo vendore, duke ruajtur traditën e Sunny Hill si platformë që bashkon talentin lokal me artistë të njohur botërisht. Detajet e plota të lineup-it priten të shpallen në javët në vijim.
