Prokuroria e Posaçme Kundër Korrupsionit dhe Krimit të Organizuar (SPAK) njoftoi të mërkurën zgjerimin e ndjeshëm të hetimeve ndaj të pandehurës Belinda Balluku, ish-ministre e Infrastrukturës dhe Energjisë. Në kuadër të procedimit penal nr. 136 të vitit 2025, provat dixhitale dhe metodat speciale të hetimit kanë nxjerrë në dritë fakte të reja penale, ndër të cilat edhe sekuestrimi i një vileje në kompleksin "Green Coast" në Palasë të Himarës.
Sipas njoftimit zyrtar të SPAK-ut, vila me numër "2F nr.188/1, Nukli 27" dyshohet se është pasuri faktike e Ballukut, e fshehur me qëllim nga autoritetet. Për të mbuluar pronësinë e vërtetë, e pandehura dyshohet se ka shfrytëzuar shtetasin Igli Tare, duke krijuar dokumentacion fiktiv — fillimisht nëpërmjet një kontrate sipëmarrjeje të datës 26 tetor 2020 me vlerë 250 mijë euro, dhe më pas nëpërmjet një kontrate shitjeje fiktive të datës 12 shtator 2025.
Lidhja me tenderin e Unazës dhe investitori i dyshuar
Hetimet kanë zbuluar se investimi në ndërtimin e vilës ka pasur si burim shoqërinë "Alko Impex General Construction", pronë e shtetasit Arbër Abazi. Kjo shoqëri ishte pikërisht fituese e tenderit të prokurimit publik me objekt "Ndërtimi i Unazës së Jashtme të Tiranës, Loti 7" — me fond limit mbi 2.35 miliardë lekë pa TVSH. SPAK supozon se Balluku ka favorizuar drejtpërdrejt këtë shoqëri në procedurën e tenderit, ndërsa ka marrë si kundërvlerë investimet e realizuara në vilën e Palasës, me vlerë të vlerësuar ndërmjet 288 mijë dhe 410 mijë euro.
Akuzat e reja, të shtuara mbi ato ekzistuese, përfshijnë: "Korrupsioni pasiv i funksionarëve të lartë shtetërorë", "Mosdeklarimi dhe fshehja e pasurive" sipas neneve 260 dhe 257/a të Kodit Penal, si dhe "Pastrimi i produkteve të veprës penale" në bashkëpunim dhe në mënyrë të përsëritur. Ndërkohë, Arbër Abazi akuzohet për "Korrupsion aktiv të funksionarëve të lartë shtetërorë", kurse Igli Tare dyshohet për pastrim parash.
Akuza të zgjeruara dhe personazhe të rinj në dosje
Akuzat ndaj Ballukut nuk kufizohej vetëm në Lotin 7 të Unazës — procedimi penal numëron gjithsej tetë tendera të ndryshëm, ndër të cilët punimet e tunelit të Llogarasë, segmente rrugore të Sheshit Shqiponja dhe lote të tjera të Unazës së Jashtme. Në bashkëpunim me të dyshuarën renditen edhe titullari i autoritetit kontraktor Evis Berberi, anëtarë të njësisë së prokurimit si Miranda Shkurti, Dhurata Lazaj dhe Nikollaq Mihali, si dhe anëtarë të komisionit të vlerësimit të ofertave.
Gjithashtu, edhe personi juridik "Alko Impex General Construction" si subjekt tregtar figuron në listën e të dyshuarve për korrupsion aktiv. Ky zgjerim i dosjes tregon se SPAK po synon jo vetëm individët, por edhe kompanitë e përfshira në skemën e dyshuar të favoreve të ndërsjella.
Çështja e Ballukut mbetet ndër dosjet më të rëndësishme të SPAK-ut në vitet e fundit, duke prekur drejtpërdrejt mënyrën e menaxhimit të fondeve publike në infrastrukturë. Hapat e ardhshëm hetimore pritet të sqarojnë plotësisht rrjetin e personave dhe kompanive të implikuara, ndërsa opinioni publik dhe politika shqiptare ndjekin me vëmendje të shtuar ecurinë e kësaj çështjeje.
BurimiGazeta Expres
