Çmimi i pesë produkteve bazë — miell, oriz, makarona, vaj luledielli dhe sheqer — mund të ndryshojë me mbi 1,000 lekë brenda të njëjtit qytet shqiptar, ndërkohë që diferenca mes qyteteve të ndryshme të vendit mbeten gjithashtu të konsiderueshme. Ky është konkluzioni i një analize të detajuar të çmimeve të shportës ushqimore në tetë qytetet kryesore të Shqipërisë: Tiranë, Durrës, Elbasan, Fier, Vlorë, Shkodër, Lezhë dhe Sarandë, bazuar në të dhënat e platformës zyrtare "Pasqyra e Çmimeve".
Lezha dhe Elbasani, çmimet maksimale më të ulëta në vend
Ndër të gjitha qytetet e analizuara, Lezha dhe Elbasani shquhen për vlerat maksimale më të ulëta të shportës ushqimore, të cilat arrijnë në 1,133 lekë — dukshëm nën nivelin e Tiranës, Durrësit, Fierit dhe Vlorës, ku maksimumi shkon deri në 1,535 lekë. Vlera minimale në Lezhë është 459 lekë, duke krijuar një diferencë prej 694 lekësh mes çmimit më të ulët dhe atij më të lartë — hendeku më i ngushtë ndër të gjitha qytetet e përfshira në krahasim.
Fieri shënon vlerën minimale më të lartë prej 508 lekësh, që do të thotë se edhe me zgjidhjen më të lirë të disponueshme, qytetarët e Fierit paguajnë më shumë se homologët e tyre në qytetet e tjera. Ndërkohë, Tirana, Durrësi dhe Saranda ndajnë të njëjtën vlerë minimale prej 429 lekësh — nivelin më të ulët ndër tetë qytetet. Durrësi, kundër çdo pritshmërie, dallohet me çmime identike me kryeqytetin edhe për vlerën maksimale, duke arritur gjithashtu në 1,535 lekë.
Shkodra pozicionohet në një nivel të mesëm: vlera minimale është 471 lekë dhe maksimale 1,391 lekë, me një diferencë prej 920 lekësh. Saranda, qyteti jugor me peshë turistike, ka vlerë maksimale disi më të moderuar — 1,403 lekë — me diferencë prej 974 lekësh nga minimumi.
Çmimet e orizit dhe vajit, intervalat me luhatjet më të mëdha
Midis pesë kategorive të produkteve, orizi paraqet intervalin më të gjerë çmimesh. Në Tiranë dhe Durrës, kilogrami i orizit shkon nga 75 deri në 419 lekë, ndërsa në Elbasan dhe Lezhë maksimumi ndalet në 240 lekë për kilogram. Edhe vaji i lulediellit shfaq luhatje të ngjashme: në Elbasan dhe Lezhë çmimi varion nga 170 deri në 205 lekë për litër, ndërkohë që në Tiranë, Durrës, Fier, Vlorë dhe Sarandë maksimumi arrin 419 lekë për litër.
BurimiMonitor
