Agron Shehaj, kryetar i partisë "Mundësia", zbriti në Bulevardin "Dëshmorët e Kombit" dhe u rreshtua krah protestuesve që mbushën rrugët e kryeqytetit. Duke folur drejtpërdrejt nga vendi i ngjarjes, ai ngriti akuza të rënda ndaj kryeministrit Edi Rama, të cilin e konsideron si burimin e urdhrave për shpërndarjen me forcë të turmës.
Akuza ndaj Ramës: "Ai drejton personalisht dhunën"
Sipas Shehajt, para ndërhyrjes policore nuk ka pasur asnjë akt dhune nga ana e protestuesve. "Sot Edi Rama dha urdhër që të shpërndajë një protestë paqësore. Ne ishim këtu, nuk gjuajti askush me gurë, nuk pati asnjë akt dhune, por në një moment të caktuar kur e pa që po mblidheshin shumë, filloi t'i shtynte dhe t'i largonte me dhunë. Përse? Sepse do të ndalë protestën, sepse do të ndalë ndryshimin, sepse do të ndalë të rinjtë", deklaroi ai.
Kreu i "Mundësisë" shkoi edhe më tej, duke e personalizuar drejtpërdrejt përgjegjësinë: "Është Edi Rama që drejton policinë, është Edi Rama që drejton personalisht dhunën kundër protestuesve, mendon se me dhunë do t'ia dalë. I ka bërë llogaritë gabim, sepse kjo rini ka një kurajo të jashtëzakonshme, ka një dëshirë dhe një këmbëngulje që askush nuk e ka parë në këto 30 vitet e fundit."
Pedagogëve i kërkon praninë e plotë, jo vetëm solidaritetin
Pasi pedagogët vendosën të pezullojnë mësimin dhe t'i bashkohen bojkotit të nisur nga studentët, Shehaj u kërkoi atyre të shkojnë edhe një hap më tej. "Nuk duhet thjesht të solidarizohen me studentët, duhet të jenë aty bashkë me studentët. Shumë mirë bënë që u bashkuan sot. Duhet t'i bashkohen jo vetëm në mëngjes, por gjatë gjithë ditës, çdo ditë derisa Edi Rama të largohet", theksoi ai.
Shehaj e vuri në dukje edhe karakterin qytetar e jopartiak të lëvizjes, duke e parë këtë si forcën e saj kryesore. Sipas tij, qytetarët në shesh nuk janë militantë partiakë që kërkojnë favore, por njerëz që duan të rrëzojnë një klasë politike që, me fjalët e tij, "ua ka bërë jetën të pamundur prindërve të tyre".
Protestës i janë bashkuar edhe figura të tjera të jetës publike. Ndërkohë, situata në Tiranë mbeti e tensionuar gjatë gjithë ditës: policia përdori gaz lotsjellës, kapsolla dhe ujë me kimikate, dy protestues u dërguan në spital, ndërsa përplasje të tjera u zhvendosën në zona të ndryshme të kryeqytetit. Shehaj përfundoi duke bërë thirrje për dorëheqjen e menjëhershme dhe pa kushte të kryeministrit.
BurimiAlbeu
