Harta administrative e Shqipërisë pritet të ndryshojë rrënjësisht nëse reforma e re territoriale kalon me sukses votimin në seancën plenare të datës 8 tetor. Projektligji, i cili tashmë ka marrë miratimin e Komisionit të Ligjeve, parashikon reduktimin e numrit të bashkive nga 61 në 46, nëpërmjet shkrirjes së 15 njësive lokale me bashki fqinje e më të mëdha. Për hyrjen në fuqi të ligjit kërkohen 84 vota në Kuvend.
Struktura e re territoriale do të përfshijë 46 bashki, 71 qytete përbërëse dhe 387 njësi administrative. Qarqet, në ndryshim nga bashkitë, nuk preken nga ky riorganizim dhe mbeten të pandryshuara. Bashkia vazhdon të jetë njësia bazë e vetëqeverisjes vendore.
15 bashkitë që bashkohen me njësi të tjera
Sipas draftit të Komisionit të Ligjeve, bashkitë që humbasin statusin e tyre aktual dhe bashkohen me njësi administrativo-territoriale fqinje janë: Fushë-Arrëzi me Bashkinë Pukë, Klosi me Bashkinë Mat, Rrogozhina me Bashkinë Kavajë, Dimali dhe Poliçani me Bashkinë Berat, Patosi me Bashkinë Fier, Divjaka me Bashkinë Lushnjë, Selenica me Bashkinë Vlorë, Maliqi me Bashkinë Korçë, Këlcyra me Bashkinë Përmet, Memaliaj me Bashkinë Tepelenë, Libohova me Bashkinë Gjirokastër, si dhe Cërriku e Belshi me Bashkinë Elbasan dhe Përrenjasi me Bashkinë Librazhd.
Ndërkohë, bashkimet sjellin edhe ristrukturime të brendshme. Bashkia Kurbin, për shembull, do të shtrijë juridiksionin mbi tre qytete: Laçin, Mamurrasin dhe Milotin. Po ashtu, Bashkia Kavajë, pas përfshirjes së Rrogozhinës, do të administrojë Kavajën, Rrogozhinën dhe Golemin nën të njëjtën njësi.
Gjashtë zona fitojnë statusin e qytetit
Reforma parashikon gjithashtu ngritjen e statusit të gjashtë qendrave urbane, të cilat kalojnë në kategorinë e qytetit. Bëhet fjalë për Kastratin në Bashkinë Malësi e Madhe, Bushatin në Bashkinë Vau i Dejës, Ulzën në Bashkinë Mat, Krastën në Bashkinën Bulqizë, Milotin në Bashkinën Kurbin dhe Golemin në Bashkinën Kavajë. Ky riklasifikim është shtesa e fundit e bërë gjatë shqyrtimit në komision.
Reforma administrativo-territoriale është ndër ndryshimet më të rëndësishme strukturore të qeverisjes vendore që nga riorganizimi i vitit 2015, kur numri i bashkive u ul nga 373 në 61. Nëse Kuvendi jep dritën jeshile javën e ardhshme, efektet praktike do të ndihen drejtpërdrejt te qytetarët e zonave të prekura — nga ofrimi i shërbimeve publike deri te struktura e pushtetit vendor. Debati politik mbi reformën pritet të nxehet edhe më shumë ditët në vijim.
BurimiEuro news Albania
