Ministria e Ekonomisë dhe Inovacionit ka hartuar një projektligj që synon të ndryshojë rrënjësisht mënyrën si përfaqësohet biznesi shqiptar në nivel institucional. Nismë ligjore parashikon shfuqizimin e ligjit të vitit 2006 për Dhomat e Tregtisë dhe Industrisë dhe zëvendësimin e tij me një arkitekturë të re të dyfishtë: Dhomën Ekonomike Kombëtare dhe Dhomat Sektoriale, të organizuara sipas fushave specifike të ekonomisë.
Sipas relacionit shpjegues që shoqëron projektaktin, ndryshimi i propozuar vjen si nevojë e domosdoshme për t'i dhënë fund fragmentimit të sistemit aktual, i cili mungon tërësisht nga një qendër koordinuese e konsoliduar. Dokumenti zyrtar thekson se qëllimi i reformës është "forcimi i rolit të subjekteve tregtare në proceset e dialogut institucional dhe hartimit të politikave publike me ndikim në zhvillimin ekonomik të vendit".
Struktura e re dhe organet drejtuese
Dhoma Ekonomike Kombëtare do të njihet ligjërisht si person juridik i së drejtës publike, duke i dhënë kësaj strukture autoritet dhe pesha institucionale në raport me organet shtetërore. Nën ombrellën e saj do të veprojnë Dhomat Sektoriale, të ndara sipas degëve të ekonomisë, me qëllim një përfaqësim më të specializuar të interesave të komunitetit të biznesit. Organet kryesore drejtuese do të jenë Asambleja e Përgjithshme, Bordi Drejtues, Kryetari dhe Sekretari i Përgjithshëm. Relacioni nënvizon gjithashtu se reforma do të sjellë "përmirësim të shërbimeve ndaj subjekteve tregtare dhe rritje të transparencës e efikasitetit" në funksionimin e institucionit.
Kostoja dhe faza tranzitore
Kalimi nga sistemi i vjetër në atë të ri do të menaxhohet nëpërmjet një periudhe tranzitore njëvjeçare, e drejtuar nga një Komision i Përkohshëm Teknik. Sipas vlerësimit financiar të bashkëngjitur projektligjit, kostoja paraprake e kësaj faze është rreth 15.4 milionë lekë. Ky buxhet do të mbulojë ngritjen e infrastrukturës teknologjike bazë, shpenzimet administrative dhe organizimin e zgjedhjeve të para për organet drejtuese.
Pas përfundimit të fazës tranzitore, Dhoma Ekonomike Kombëtare pritet të financojë veprimtarinë e saj plotësisht nga tarifat e regjistrimit dhe shërbimet e ofruara, pa lënë asnjë barrë të përhershme financiare mbi buxhetin e shtetit. Projektligji është vlerësuar gjithashtu në përputhje me detyrimet që rrjedhin nga Marrëveshja e Stabilizim-Asociimit me Bashkimin Evropian, sidomos në drejtim të forcimit të dialogut me komunitetin e biznesit — një kërkesë e vazhdueshme në kuadër të procesit të integrimit evropian të Shqipërisë.
Para miratimit përfundimtar, projektligji do t'u dërgohet për konsultim Ministrisë së Drejtësisë, Ministrisë së Financave dhe Bashkimit aktual të Dhomave të Tregtisë dhe Industrisë. Nëse do të miratohet, reforma do të shënojë ndryshimin më të thellë të sistemit të dhomave të tregtisë në Shqipëri prej dy dekadash.
BurimiRTSH
