Rezidenca qeveritare e Pogradecit u bë sot qendra e vëmendjes politike, teksa kryeministri Edi Rama thirri pranë tij 12 drejtuesit politikë të qarqeve të Partisë Socialiste, si dhe kryetarët e komisioneve parlamentare. Takimi, i cili nisi rreth orës 11:20, synon të shqyrtojë organizimin e brendshëm të strukturave socialiste dhe të vendosë themelet për sfidën e ardhshme elektorale.
I pari që mbërriti në vendtakim ishte drejtuesi politik i Qarkut të Shkodrës, Enea Karakaçi, ndërsa kryeministri Rama u paraqit pak më vonë, duke i dhënë startit punimeve të cilat janë parashikuar të zgjasin dy ditë. Juglindja e vendit është vendosur këto ditë nën masa të forta sigurie për shkak të mbledhjeve të rëndësishme që po zhvillohen.
Shkrirja e bashkive dhe dokumentet "Besa" e "Prania Besnike"
Fjalimi i hapjes nga Rama zgjati rreth një orë. Në të, kryeministri u kërkoi drejtuesve politikë të lexojnë dy dokumente që PS-ja i quan themelore: "Besa" dhe "Prania Besnike". Një nga pikat më të diskutuara ka qenë çështja e shkrirjes së bashkive — proces i cili, sipas burimeve, ka ngjallur debate të brendshme brenda partisë. Rama u drejtua drejtpërdrejt drejtuesve politikë të bashkive të prekura nga ky proces, duke i pyetur për shkaqet e revoltës qytetare dhe duke u kërkuar atyre të shpjegojnë hapur se shkrirja do të sjellë shërbime më të mira dhe më të shpejta për banorët.
Rama gjithashtu u bëri thirrje drejtuesve politikë që të fillojnë identifikimin e kandidaturave të mundshme për zgjedhjet lokale të vitit 2027, duke vënë theksin te figura që janë të lidhura ngushtë me komunitetin dhe jo vetëm me strukturat partiake.
Dita e dytë sjell ministrat dhe objektiva konkrete
Programa e kësaj të diele parashikon edhe një prezantim nga Jonida Shehu mbi platformën e vlerësimit të aktivitetit mediatik, ndërsa dita do të mbyllet me fjalën përmbyllëse të kryeministrit. Në darkë, pjesëmarrësit bashkë me ministrat pritet të mblidhen në një nga hotelet e Tushemishtit.
Nesër, të hënën, mbledhja do të marrë karakter më të gjerë: përveç ministrave, do të jenë të pranishëm edhe drejtorët e institucioneve kryesore shtetërore. Dita do të përfundojë me hartimin e një dokumenti të konsoliduar që do të pasqyrojë të gjithë diskutimet e kryera dhe do të fiksojë objektivat e PS-së drejt zgjedhjeve të 2027. Retreat-i i Pogradecit duket se synon të japë ritmin e ri organizativ të mazhorancës pas fitores elektorale të qershorit.
BurimiEuro news Albania
