Kryeministri Edi Rama ka ndezur një shkëmbim të ashpër me Partinë e Demokratëve Evropianë, pasi kjo e fundit shpreh shqetësime serioze për mënyrën se si autoritetet shqiptare trajtuan protestat e ditës së djeshme para Kuvendit të Shqipërisë. Rama e cilëson qëndrimin e tyre si mbështetje të hapur ndaj dhunës dhe pengimit të deputetëve, duke u kërkuar të mos e "përfshijnë Shqipërinë në këtë histori".
Rama: "Nuk quhet kundërshtim demokratik"
Në reagimin e tij të publikuar në rrjetet sociale, kryeministri iu drejtua Demokratëve Evropianë me një ton të ashpër, duke e konsideruar pozicionin e tyre si të pasaktë dhe politikisht të motivuar. Sipas Ramës, ajo që ndodhi para Kuvendit — bllokimi i hyrjes së deputetëve, hedhja e vezëve dhe gurëve, si dhe fyerjet ndaj tyre — nuk mund të kategorizohet si veprim i kundërshtimit demokratik. "Pengimi i deputetëve që të hyjnë në seancën hapëse të Parlamentit quhet 'kundërshtim'? Ndoshta kështu duket nga rehatia e tastierës suaj. Por, jo për kolegët tuaj shqiptarë, nga e djathta në të majtë, të cilët u detyruan të kalonin mes një korridori sharjesh dhe dhune fizike", shkroi Rama.
Kryeministri u ndal veçanërisht te rasti i deputetes Iris Luarasi, akademike dhe mbrojtëse e të drejtave të grave, e cila u fye dhe keqtrajtua ndërsa përpiqej të arrinte në vendin e saj të punës. Ai u bëri thirrje Demokratëve Evropianë të jepnin shpjegime konkrete për këtë rast para se të gjykonin mbi situatën në Shqipëri.
Demokratët Evropianë: "Provë serioze e standardeve demokratike"
Partia e Demokratëve Evropianë kishte reaguar pasi protestat e Tiranës hynë në ditën e 101-të radhazi, duke shprehur shqetësim për numrin e ndalimeve, ashpërsinë e reagimit policor dhe praninë e personave pa uniformë që ndërhynë në turmë. Sipas tyre, këto zhvillime, të kombinuara me kufizimin e llogarive të mediave sociale të lidhura me protestat, përbëjnë shkelje të lirisë së shprehjes. "Nën udhëheqjen e Edi Ramës, Shqipëria po përballet me një provë serioze të standardeve të saj demokratike. Një vend që kërkon të anëtarësohet në Bashkimin Evropian duhet të forcojë sundimin e ligjit dhe të garantojë të drejtën për të protestuar", deklaroi partia europiane.
Rama e kundërshton kategorikisht këtë vlerësim, duke e quajtur Shqipërinë "një vend realisht i lirë dhe shumë më demokratik sesa politika mendjengushtë" e atyre që e kritikojnë. Sipas tij, fjalët e Demokratëve Evropianë janë produkt i "angazhimit të lirë politik" dhe jo i fakteve reale.
Ky shkëmbim ndodh në një moment të ndjeshëm për procesin e integrimit europian të Shqipërisë, ku çdo zhvillim i brendshëm politik vëzhgohet me kujdes nga Brukseli. Shtyrja e mëtejshme e tensioneve mes qeverisë dhe opozitës, por edhe me struktura europiane si Demokratët Evropianë, mund të ndikojë në dinamikat e bisedimeve të anëtarësimit gjatë muajve në vijim.
Shiko edhe
BurimiRTSH
