Milan Radoiçiqi, njeriu që pranoi publikisht se organizoi sulmin e armatosur terrorist në Banjskë të Zveçanit më 24 shtator 2023, është shfaqur i lirë dhe i paprekur në tubimin e organizuar nga presidenti serb Aleksandar Vuçiq, të mbajtur më 27 qershor në Beograd. Fotot dhe videot e qarkulluar në rrjetet sociale, si dhe media serbe, e vendosin Radoiçiqin qartësisht mes mbështetësve të presidentit.
Sulmi i Banjskës mbylli jetën e rreshterit të Policisë së Kosovës, Afrim Bunjaku, dhe u cilësua ndërkombëtarisht si akt terrorist i drejtuar kundër sovranitetit të Kosovës. Megjithatë, Radoiçiqi — ish-nënkryetar i Listës Serbe — ka vazhduar të lëvizë lirisht në Serbi, pa asnjë masë ndëshkimore nga autoritetet e Beogradit.
Prania e tij krah Vuçiqit në një aktivitet publik kaq të dukshëm sipas Telegrafit ka ngjallur reagime të forta, duke i shtuar presion institucioneve ndërkombëtare që kërkojnë llogaridhënie për krimet e kryera kundër Kosovës.
