Strehimi me qira në Tiranë po kthehet gjithnjë e më shumë në barrë të rëndë për familjet dhe të rinjtë shqiptarë. Gjatë periudhës janar–qershor 2026, qiraja mesatare mujore për apartamentet me një dhomë gjumi (1+1) arriti në 590 euro, nga 565 euro që ishte në të njëjtën periudhë të vitit 2025 — një rritje prej 4.4%. Situata është edhe më e vështirë për banesa më të mëdha: qiraja mesatare për apartamentet 2+1 u ngrit në 954 euro në muaj, kundrejt 755 eurove të vitit të kaluar, duke shënuar një rritje prej rreth 26%.
Ekspertët imobiliarë vërejnë se prapa kësaj shtrenjtimi qëndrojnë tre faktorë kryesorë: kërkesa gjithnjë në rritje, zgjerimi i qirave afatshkurtra (ditore), si dhe oferta e pamjaftueshme e banesave në treg. Sipas llogaritjeve, në pjesën dërrmuese të lagjevë të Tiranës — nga periferitë deri në qendër — kostoja e strehimit tejkalon tashmë kufirin ndërkombëtar të përballueshmërisë, atë prag ku qiraja nuk duhet të kalojë 30% të të ardhurave familjare.
Zonat qendrore — çmimet e paprecedentë
Rritjet më të mëdha u regjistruan në zonat qendrore të kryeqytetit. Pranë stadiumit "Air Albania", qiraja mesatare për apartamentet 1+1 arriti në 800 euro në muaj — 45% më shumë se një vit më parë. Zona e ish-Bllokut qëndron në 700 euro mujore, ndërsa rreth "Myslym Shyrit" qiraja për apartamentet 2+1 u rrit me 87%, duke arritur në 1.400 euro në muaj. Zonat pranë stadiumit "Selman Stërmasi" dhe "Air Albania" regjistruan qira mesatare prej 1.500 eurosh në muaj për banesat 2+1.
Sipas agjentit imobiliar Dritan Leka, apartamentet 2+1 janë produkti më i kërkuar në treg, pasi u përshtaten njëkohësisht familjeve, çifteve të reja dhe profesionistëve që ndajnë banesën. Ai vë në dukje edhe një faktor shpesh të nënvlerësuar: rritjen e numrit të të huajve — diplomatëve, punonjësve të kompanive ndërkombëtare dhe turistëve afatgjatë — që kërkojnë prona me standard të lartë në zona premium si ish-Blloku, Komuna e Parisit dhe Liqeni Artificial. Kjo shtresë kërkesash shton presionin mbi çmimet, veçanërisht në segmentin e banimit cilësor.
Periferia — lirë, por jo më aq
Edhe lagjete periferike nuk mbetën jashtë valës së shtrenjtimit. Në "Astir", qiraja mesatare për 1+1 arriti 550 euro, me rritje 16%, ndërsa në "Zogun e Zi" u ngrit me 29%, duke arritur 620 euro në muaj. Megjithatë, periferia vazhdon të ofrojë alternativa relativisht më të përballueshme krahasuar me bërthamën e qytetit. Disa zona si "Don Bosko", "Kinostudio" dhe "Kombinat" shënuan rritje modeste prej 2–3%. Rëniet e rralla u evidentuan në "Selman Stërmasi" (-23%), Liqenin Artificial (-15%) dhe Komunën e Parisit (-6%), ku numri i transaksioneve ka rënë.
Edhe të dhënat zyrtare të Institutit të Statistikave (INSTAT) konfirmojnë trendin: indeksi vjetor i çmimit të qirave ka shënuar rritje të vazhdueshme që nga viti 2022, me një përshpejtim të dukshëm nga maji 2025 e në vazhdim, duke arritur deri 8.5% në fund të vitit 2025. Për muajin maj 2026, rritja vjetore e çmimeve të qirave u vendos në 6%. Nëse tendenca aktuale vazhdon, viti 2026 rrezikon të mbyllet si viti më i vështirë për strehimin me qira që nga fillimi i dekadës.
BurimiMonitor
