Seanca plenare e Kuvendit të Shqipërisë e datës 22 tetor 2026 u shndërrua në skenë incidentesh të rënda, që çuan në depozitimin e një kërkese zyrtare nga Partia Socialiste për përjashtimin e 20 deputetëve të Partisë Demokratike. Sipas PS-së, gjatë seancës u shënuan fyerje, provokime dhe sulme fizike nga anëtarë të opozitës, duke cenuar rëndë rendin dhe funksionimin normal të parlamentit.
Kërkesa u dërgua drejtuar Kryetarit të Kuvendit dhe Sekretariatit për Procedurat, Votimet dhe Etikën. Në të thuhet se incidentet nisën qysh në fillim të seancës dhe u përshkallëzuan me bllokimin e foltores nga deputetë të opozitës.
Akuzat: nga goditja e mikrofonit te hedhja e shisheve
Sipas pretendimeve të Partisë Socialiste, deputeti Flamur Noka ishte ndër figurat kryesore të incidenteve. Ai dyshohet se iu afrua foltores, e goditi dhe dëmtoi mikrofonin, pastaj përdori fjalë fyese ndaj Kryetarit të Kuvendit. Gjatë votimit për kalendarin dhe programin e punimeve, deputeti Belind Këlliçi, pasi deklaroi qëndrimin kundër të Grupit Parlamentar të PD-së, nuk u largua nga foltorja — sipas PS-së ai shkuli pajisjet e saj dhe vijoi t'i godiste me to.
Situata u ashpërsua më tej kur, në çastin që mori fjalën kryetari i Grupit Parlamentar Socialist Taulant Balla, Flamur Noka dyshohet se sulmoi fizikisht deputetë socialistë duke hedhur shishe uji. Kërkesa e PS-së i identifikon si të sulmuar dhe të fyer deputetët Ervin Hoxha, Arkend Balla, Fadil Nasufi, Agron Malaj dhe Bujar Rexha.
Kush kërkohet të përjashtohet dhe për sa kohë
Partia Socialiste kërkon përjashtimin për 60 ditë nga punimet e Kuvendit të gjashtë deputetëve: Flamur Noka, Belind Këlliçi, Fidel Kreka, Luçiano Boçi, Edi Paloka dhe Besart Xhaferri. Për 10 ditë përjashtim kërkohet për 14 deputetë të tjerë — Gjin Gjoni, Bardh Spahia, Albana Vokshi, Elda Hoti, Xhelal Mziu, Gent Strazimiri, Enno Bozdo, Kastriot Piroli, Kliti Hoti, Flamur Hoxha, Arjan Ndoja, Ivi Kaso, Zija Ismaili dhe Blendi Himçi — të cilët akuzohen se morën pjesë aktive në bllokimin e foltores dhe penguan zhvillimin normal të seancës.
Partia Socialiste i cilëson këto veprime si shkelje të rënda të etikës dhe disiplinës parlamentare, duke theksuar se ato dëmtuan autoritetin e Kuvendit dhe penguan procesin e votimit. Incidentet e sotme ndodhin në një klimë të tensionuar politike në vend, ndërsa opozita ka intensifikuar veprimet e saj brenda dhe jashtë parlamentit. Vendimi i Sekretariatit për Procedurat dhe Etikën pritet të bëhet i njohur në ditët në vijim dhe do të jetë test i rëndësishëm për funksionimin e institucioneve parlamentare.
BurimiAlbeu
