Anëtarët e iniciativës qytetare "Jo në emrin tim" kanë ndërmarrë një aksion të drejtpërdrejtë para banesave të kryetarëve të grupeve parlamentare të Lëvizjes Vetëvendosje, PDK-së dhe Aleancës për Ardhmërinë e Kosovës — Arbërie Nagavci, Arian Tahiri dhe Besnik Tahiri. Qëllimi i aksionit është ushtrimi i presionit për thirrjen sa më të shpejtë të seancës së Kuvendit dhe votimin e projektligjit për ndryshimin e Ligjit për Dhomat e Specializuara, projektligj i cili shihet si hap kyç në mbrojtjen e ish-luftëtarëve të Ushtrisë Çlirimtare të Kosovës.
Deputetët: Nënshkrimet janë mbledhur, topi është te kryetarja e Kuvendit
Gjatë ballafaqimit me protestuesit, Arbërie Nagavci u shpreh se procedura e mbledhjes së nënshkrimeve për thirrjen e seancës ka përfunduar. "Nënshkrimet i kemi mbledh, është turp për ty me më thanë mu marrë pa bo asgjë", tha Nagavci, duke iu adresuar kritikave të protestuesve. Besnik Tahiri nga PDK-ja konfirmoi po ashtu se nënshkrimet janë dorëzuar dhe se projektligji ekziston. "Po i kemi mbledh edhe i kena dhanë nënshkrimet pardje. Nënshkrimet janë, ligji është. Hashim Thaçi, Kadri Veseli, Jakup Krasniqi e Rexhep Selimi kanë nevojë për këtë ligj", deklaroi ai.
Edhe Arian Tahiri nga Aleanca theksoi se procedurat parlamentare duhet të vazhdojnë menjëherë, duke vënë përgjegjësinë mbi kryetaren e Kuvendit. "Ligji për Gjykatën Speciale është Kuvend e tash duhet kryetarja e Kuvendit sa ma shpejt me thirrë seancën", u shpreh ai. Të tre drejtuesit parlamentarë, pra, e pranojnë ekzistencën e projektligjit dhe të nënshkrimeve, ndërsa ia kalojnë njëri-tjetrit dhe kreut të Kuvendit hapat pasues.
Gara me kohën: Afati i presidentit dhe rreziku i shpërndarjes së Kuvendit
Aksioni vjen në një moment veçanërisht të nderë. Kosovës i kanë mbetur më pak se 72 orë nga skadimi i afatit kushtetues për zgjedhjen e presidentit të vendit. Nëse Kuvendi dështon të zgjedhë presidentin brenda afatit ligjor, vendi do të shkojë në zgjedhje të parakohshme — dhe me këtë, e gjithë legjislatura aktuale do të shpërbëhet. Ky skenar do të thotë, sipas protestuesve, se projektligji për ndryshimin e Ligjit për Dhomat e Specializuara nuk do të ketë mundësi të kalojë nga kjo përbërje e Kuvendit.
Iniciativa "Jo në emrin tim" kërkon që zotimet e bëra nga grupet parlamentare të materializohen menjëherë në veprim konkret: seanca të thirret me urgjencë dhe deputetët të marrin pozicion duke votuar ligjin. Protestuesit e kanë bërë të qartë se s'do të mjaftohen me premtime verbale, por kërkojnë veprim të matshëm brenda orëve në vijim. Presioni qytetar mbi Kuvendin e Kosovës, në një javë vendimtare si kjo, i jep ngjarjes një peshë politike të veçantë për të ardhmen e ish-luftëtarëve të UÇK-së.
BurimiTelegrafi
