Protesta studentore në Tiranë ka hyrë në ditën e saj të 11-të, me qytetarë dhe studentë që vijojnë të mblidhen në Bulevardin "Dëshmorët e Kombit", përpara selisë së kryeministrit. Situata mbetet e qetë dhe deri tani nuk është raportuar asnjë incident gjatë tubimeve.
Kërkesa kryesore e protestuesve mbetet dorëheqja e kryeministrit Edi Rama. Pavarësisht thirrjeve të përsëritura të kreut të qeverisë për dialog, të rinjtë pjesëmarrës kanë refuzuar kategorikisht çdo lloj bisede dhe kanë vendosur të vazhdojnë protestën deri në arritjen e objektivave të tyre.
Mjekë dhe pedagogë bashkohen me lëvizjen
Gjatë paradites, grupit të protestuesve iu bashkuan studentë të mjekësisë, pedagogë universitarë dhe përfaqësues të stafit shëndetësor, duke zgjeruar ndjeshëm bazën e lëvizjes. Bashkimi i grupeve profesionale me protestat studentore tregon se pakënaqësia po kapërcen kufijtë e kampuseve universitare dhe po merr karakterin e një lëvizjeje më të gjerë shoqërore.
Ndërkohë, organizata LZHK ka bërë publik planin e saj për tejkalimin e krizës aktuale, duke kërkuar gjithashtu dorëheqjen e Ramës dhe formimin e një qeverie të re me bazë të gjerë. Edhe kreu i Partisë Demokratike, Sali Berisha, ka bërë thirrje për demokratëve të marrin pjesë në protestë të shtunën, duke shprehur mbështetje të plotë për studentët.
Nesër marshim në shkallë kombëtare
Momenti më i rëndësishëm pritet të jetë nesër, kur është njoftuar një tubim kombëtar. Protesta parashikohet të zhvillohet njëkohësisht para ndërtesës së kryeministrisë dhe para Ministrisë së Arsimit, duke synuar të mobilizojë qytetarë nga e gjithë vendi.
Nëse tubimi i nesërm arrin pjesëmarrjen e pritur, do të jetë momenti me ndikim më të madh deri tani i kësaj vale protestash, që ka zënë fill nga kampuset universitare dhe tani rrezikon të shndërrohet në sfidën më serioze politike me të cilën përballet qeveria Rama gjatë këtij mandati. Sytë e opinionit publik shqiptar do të jenë nesër drejtuar Tiranës dhe qyteteve të tjera të vendit.
BurimiAlbeu
