Partia Demokratike e Kosovës (PDK) ka ndërmarrë hap të ri ligjor në kuadër të krizës së moskonstituimit të Kuvendit, duke depozituar kallëzim penal në Prokurorinë Speciale kundër deputetit Avni Dehari. Dehari, si deputeti më i moshuar i Kuvendit, mban funksionin e kryesuesit të seancës konstituive, por sipas PDK-së nuk po e ushtron këtë detyrë ashtu siç kërkon ligji.
Deputeti i PDK-së, Gruda, shpjegoi se kallëzimi penale bazohet në nenin 414 të Kodit Penal të Kosovës, duke argumentuar se Dehari ka shkelur Rregulloren e Punës së Kuvendit dhe Kushtetutën e Kosovës. Sipas rregullores, kryesuesi i seancës konstituive ka detyrimin ta mbledhë Kuvendin çdo 48 orë deri në konstituim të plotë.
"Dehari duhet ta dijë që nuk është i pari i fisit, por është kryesues i një organi të shtetit dhe kërkohet që të veprojë", deklaroi Gruda, duke shtuar se PDK-ja i ka dërguar disa herë letra me kërkesën për thirrjen e seancës, pa marrë asnjë përgjigje pozitive.
PDK-ja e qartë: Nuk bëhet pjesë e dialogut për presidentin
Gruda theksoi gjithashtu se PDK-ja nuk do të ndryshojë qëndrimin e saj ndaj procesit të negociatave për zgjedhjen e presidentit të ri, pavarësisht takimit që pati kryetari i Lëvizjes Vetëvendosje, Albin Kurti, me liderin e Lidhjes Demokratike të Kosovës, Lumir Abdixhiku. "Jemi parti në opozitë dhe nuk marrim pjesë në këtë teatër politik", tha ai, duke sqaruar se vendimi u mor pasi PDK-ja u bind se Kurti nuk ka vullnet të vërtetë për ta zgjidhur krizën institucionale.
Krahas kallëzimit penal, PDK-ja dhe Aleanca vazhduan edhe të enjten protestën e tyre para ndërtesës së Qeverisë, duke kërkuar konstituimin pa vonesa të Kuvendit. Kjo protestë ka bërë pjesë të një sërë veprimesh publike që opozita ka ndërmarrë gjatë javëve të fundit.
Kriza, peng i luftës për presidentin
Bllokada e konstituimit të Kuvendit ka zanafillën në qëndrimin e Lëvizjes Vetëvendosje, e cila doli forca e parë në zgjedhjet e qershorit, por refuzon të propozojë emrin e kryetarit të ri të legjislativit pa arritur paraprakisht marrëveshje për kreun e shtetit. Vetëvendosja paralajmëron se mungesa e konsensusit për presidentin mund ta çonte vendin drejt zgjedhjeve të reja të parakohshme, skenar ky që thellëson pasigurinë politike në Kosovë.
Kallëzimi penal i PDK-së ndaj Deharit shënon një escalim të mëtejshëm të krizës institucionale, duke e zhvendosur betejën politike edhe në terrenin e drejtësisë. Prokuroria Speciale pritet të shqyrtojë kallëzimin dhe të vendosë nëse ka bazë ligjore për ndjekje penale ndaj kryesuesit të seancës konstituive.
BurimiRTSH
