Mosmarrja e pagave të muajit gusht ka nxitur administratat gjyqësore në disa qytete të vendit të ndërpresin pjesërisht veprimtarinë e tyre. Gjykatat e Fierit, Beratit dhe Durrësit janë ndër institucionet ku situata është shtrënguar më shumë, ndërsa punonjësit paralajmërojnë vazhdimin e bojkotit nëse ngërçi nuk zgjidhet sa më parë.
Në Fier, administrata gjyqësore ndodhet në ditën e dytë radhazi të bojkotit. Qytetarëve nuk po u ofrohen shërbimet e zakonshme dhe vetëm çështjet me karakter urgjent po marrin trajtim. Punonjësit shprehen të revoltuar: paga, theksojnë ata, është burimi i vetëm i të ardhurave për familjet e tyre. Ata kanë përgatitur edhe një kërkesë zyrtare për rritje page, duke argumentuar se niveli i shpërblimit të administratës është në dispropocion të theksuar me atë të gjyqtarëve, ndërkohë që ngarkesa e punës në gjykatën e Fierit mbetet e lartë.
Berat e Durrës bashkohen me protestën
Edhe në Gjykatën e Shkallës së Parë të Juridiksionit të Përgjithshëm të Beratit, bojkoti ka nisur sot. Administrata nuk ka marrë pagat e gusht, të cilat sipas punonjësve duhej të ishin transferuar që prej datës 3 shtator. Çështjet urgjente si masat e sigurisë dhe urdhrat e mbrojtjes po vazhdojnë të trajtohen, por shumica e shërbimeve të zakonshme janë të ndaluara. Administrata e Beratit kërkon zgjidhjen e menjëhershme të situatës dhe paralajmëron se bojkoti mund të zgjasë nëse kërkesat mbeten të padëgjuara.
Në Durrës, gjendja paraqitet disi më e moderuar. Gjykata e Shkallës së Parë e atij qyteti njofton se veprimtaria është ndërprerë vetëm në seksionin civil, ndërsa shërbimet e tjera ofrohen në mënyrë të kufizuar. Gjyqtarët e Republikës ndodhen sot në Mbledhjen e Përgjithshme të Gjyqtarëve, ku diskutohet pikërisht situata e pagave — çka shpjegon edhe mungesën e tyre fizike në seli.
Institucioni i bllokuar mes Kuvendit dhe Financave
Rrënja e problemit qëndron në mosmiratimin nga Kuvendi, brenda afatit të 31 korrikut, të formulës së re për pagat e magjistratëve — siç kishte kërkuar Gjykata Kushtetuese. Këshilli i Lartë Gjyqësor dhe Këshilli i Lartë i Prokurorisë kanë përcaktuar pagën referuese, por Ministria e Financave ka refuzuar ekzekutimin e listëpagesave të rillogaritura, duke argumentuar se vendosja e formulës përfundimtare mbetet kompetencë e Kuvendit. Kjo shkëputje institucionale ka lënë pa pagë muajin gusht gjyqtarët, prokurorët dhe të gjithë stafin administrativ të gjykatave e prokurorive në vend.
Situata rrezikon të thellohet nëse Kuvendi nuk vepron me shpejtësi. Ndërkohë, qytetarëve që kanë nevojë për shërbime gjyqësore u kërkohet të kenë durim — pasojat e bllokimit institucional po ndihen drejtpërdrejt tek ata që trokisin çdo ditë në dyert e gjykatave.
BurimiRTSH
