Sheshi "Skënderbej" në Prishtinë u mbush të shtunën me mijëra qytetarë nga Kosova dhe trevat shqiptare, që zgjodhën të dalin në rrugë në mbështetje të katër ish-krerëve të Ushtrisë Çlirimtare të Kosovës — Hashim Thaçit, Jakup Krasniqit, Kadri Veselit dhe Rexhep Selimit. Tubimi u organizua vetëm katër ditë para shpalljes së vendimit nga Gjykata Speciale e Hagës, ku të katërt ndodhen në paraburgim që nga viti 2020.
Thirrja "I presim çlirimtarët në shtëpi" u bë motoja e marshit, i njohur si "Marshi për Lirinë". Pjesëmarrësit shprehën bindjen se drejtësia do të triumfojë dhe se ish-luftëtarët e UÇK-së do të kthehen në atdhe. Atmosfera ishte e ngarkuar emocionalisht, me flamuj dhe simbole të luftës çlirimtare të Kosovës.
Gucati: "UÇK-ja u ngrit kundër shtypjes, jo për të krijuar shtypje"
Kreu i Organizatës së Veteranëve të Luftës së UÇK-së, Hysni Gucati, ishte ndër folësit kryesorë të tubimit. Ai theksoi karakterin çlirimtar dhe të drejtë të luftës së UÇK-së, duke kundërshtuar çdo përpjekje për ta rishikuar historinë nëpërmjet drejtësisë ndërkombëtare. "Ushtria Çlirimtare e Kosovës nuk e krijoi shtypjen, ajo u ngrit kundër saj. Drejtësia nuk guxon kurrë të shndërrohet në rishikim të historisë, e as të përdoret si armë kundër çlirimtarëve tanë", deklaroi Gucati para turmës.
Fjala e tij pati jehonë të madhe në shesh, duke rikujtuar se çlirimtarët e UÇK-së luftuan kundër agresionit serb që kishte vënë nën zgjedhë popullin shqiptar të Kosovës gjatë viteve 1998–1999, një luftë e njohur ndërkombëtarisht si rezistencë e ligjshme çlirimtare.
Spektër i gjerë politik i bashkuar në shesh
Tubimi mblodhi përfaqësues nga pothuajse i gjithë spektri politik kosovar. Të pranishëm ishin kryetari i Partisë Demokratike të Kosovës, Bedri Hamza, deputeti dhe ish-kryeministri Ramush Haradinaj nga Aleanca për Ardhmërinë e Kosovës, si dhe kreu i Bashkimit Demokratik për Integrim, Ali Ahmeti. Mesazhin e bashkimit e forcuan edhe deputetë nga radhët e Lëvizjes Vetëvendosje, e cila është partia në pushtet.
Vendimi i Gjykatës Speciale të Hagës për Thaçin, Krasniqin, Veselin dhe Selimin pritet të shpallet më 16 shtator. Bashkimi Evropian ka bërë thirrje që ky vendim të respektohet nga të gjitha shtetet dhe palët e interesuara, duke sqaruar njëkohësisht se ai mund të apelohet. Rezultati i gjyqit pritet të ketë pasoja të rëndësishme jo vetëm për të katër të akuzuarit, por edhe për klimën politike në Kosovë dhe për marrëdhëniet e vendit me strukturat ndërkombëtare.
BurimiRTSH
