Protestat kundër kryeministrit Edi Rama hyjnë në muajin e dytë, ndërsa zërat e Diasporës shqiptare po shtohen çdo ditë. Bledar Meti, në një intervistë për News24, vlerësoi kontributin e Diasporës si thelbësor në lëvizjen qytetare kundër qeverisë.
Meti komentoi edhe gjobën që iu vendos, duke e cilësuar atë si të turpshme: "Gjobën e kam paguar. Po të ishim në Britani apo në vende të tjera demokratike, ministri përgjegjës për këtë shëmti do të kishte dhënë dorëheqjen." Ai shtoi se kërkesat e lëvizjes janë të qarta: dorëheqja e qeverisë, formimi i një qeverie tranzitore dhe ndryshimi i Kodit Zgjedhor.
Sipas tij, problemi themelor i Shqipërisë mbetet mungesa e llogaridhënies dhe modeli zgjedhor i dëmtuar. "Kryeministri dhe deputetët e tij e sulmuan Diasporën sepse ne kërkuam ndryshim të Kodit Zgjedhor", nënvizoi Meti.
Ai njoftoi gjithashtu se shqiptarët e Diasporës do të hyjnë në Atdhe më 4 korrik, të organizuar në dy autokolona — njëra nga veriu dhe tjetra nga jugu — me synimin për t'u bashkuar në shesh me protestuesit e Tiranës.
