Mesazhet me Ramën, Kryemadhi: E kam zemër, do të vijë dëshmitar në gjyqin tim Ndërsa lexoi në seancën në GJKKO mesazhet me Edi Ramën ku ky i fundit i drejtohej me fjalën “zemër”, Monika Kryemadhi u shpreh moskokëçarëse nëse ky detaj mund ta ketë bërë xheloz Ilir Metën.
Madje, ajo tha se “zemra ime” duke iu referuar sërish Ramës, do të vijë dëshmitar në gjyq.
-Mendoni se është bërë xheloz ish-bashkëshorti juaj
Monika Kryemadhi: Po le të bëhet mi zemër, sa më thonë zemra mua… ça problemi ka? I kam të gjithë zemra. Mesazhet e mia me Edi Ramën… E kam zemër. Zemra ime do të vijë dëshmitar te gjyqi im.
Më herët Monika Kryemadhi tha: Ekzistojnë komunikime me Edi Ramën, më shumë se komunikime ndërveprimesh me Ilir Metën, pra janë komunikime që tregojnë ndërveprim mes meje e Kryeministrit. Këtu është Edi Rama, pse ndryshon standardi, ose njësoj për të gjitha provat, ose seleksionimi për të shkuar tek akuzë politike. Janë përzgjedhur fragmente që i shkonin akuzës dhe janë përjashtuar ndërveprime të tjera të njëjta si për ato të tjerat. Këto komunikime nuk janë konsideruar në akuzë, megjithëse tregojnë sjelljen time institucionale. Asnjë prej komunikimeve nuk tregon ndikim të paligjshëm. Ato tregojnë se bisedimet ishin në kuadër të një procedure administrative.
