Kuvendi i Maqedonisë së Veriut ka miratuar nevojën për sjelljen e ndryshimeve në Kodin Zgjedhor nëpërmjet procedurës së shkurtuar. Votimi u zhvillua me 59 vota pro, tre kundër dhe asnjë të përmbajtur, duke hapur rrugën për reformën zgjedhore që parashikon, ndër të tjera, votimin elektronik të diasporës.
Sipas Telegrafit, nënkryetari i Kuvendit, Antonijo Miloshoski, ngarkoi Komisionin për Sistem Politik dhe Marrëdhënie Ndërmjet Komuniteteve, si organ kryesor punues, si dhe Komisionin Ligjor dhe Juridik të shqyrtojnë projektligjin. Propozimi u paraqit nga një grup deputetësh.
Ndryshimet bëjnë pjesë në kuadrin e reformave institucionale të vendit. Mundësia e votimit online për diasporën pritet të rrisë ndjeshëm pjesëmarrjen e qytetarëve që jetojnë jashtë kufijve në zgjedhjet e ardhshme. Komisioni do të caktojë afatin për shqyrtimin e mëtejshëm të projektligjit.
