Konferenca për shtyp para ndeshjes Joshua–Prenga la mbresa të forta, dhe jo vetëm për fjalët e thëna. Momenti që tërhoqi më shumë vëmendje ishte ai kur Anthony Joshua kapi dorën e boksierit shqiptar Kristian Prenga dhe të dy bënë bashkë shqiponjën — simbolin kombëtar shqiptar — para kamerave. Gesti i britanikut u vlerësua gjerësisht si shenjë respekti ndaj trashëgimisë shqiptare.
Ndeshja është programuar për të shtunën mbrëma në Jeddah të Arabisë Saudite dhe pritet të jetë një nga duelet më të vëzhguara të boksit në gjysmën e parë të vitit. Joshua, 36 vjeç, futet në ring pas fitores ndaj Jake Paul në dhjetor të vitit të kaluar, por edhe pas një periudhe të vështirë personale — britaniku humbi dy miq të ngushtë, Sina Ghami dhe Kevin Ayodele, në një aksident tragjik me automjet.
Joshua fokusohet te Prenga, refuzon të flasë për Furyn
Në fund të konferencës, gazetarët e pyetën Joshuan nëse kishte ndonjë mesazh për rivalin e tij historik Tyson Fury. Britaniku e ndërpreu pyetjen menjëherë: «Jo, jo, jo. Duhet ta respektoj kundërshtarin tim. Nuk dua të flas për Tyson Furyn, me gjithë respektin për të», deklaroi ai. Gjatë muajve të fundit, Joshua ka zhvilluar kamp stërvitor në Valencia të Spanjës, ku ka punuar krah ish-kampionit të padiskutueshëm të peshave të rënda, ukrainasit Oleksandr Usyk. «Jam plotësisht i përqendruar te kjo ndeshje. Nuk ka të ardhme nëse nuk e fitoj këtë duel», theksoi Joshua.
Promotori i tij, Eddie Hearn, shtoi se Joshua është në formën kulmore: «Anthony ka punuar më fort se kurrë. Rikthimi i tij ka qenë fenomenal». Hearn sqaroi gjithashtu se zgjedhja e Prengës si kundërshtar nuk ishte e rastësishme: «E zgjodhëm Prengën sepse është kundërshtar serioz. Të shtunën do të shohim nëse është gati të notojë me peshqit e mëdhenj».
Prenga i bindur: «Do ta fitoj me nokaut»
Nga ana e tij, Kristian Prenga u shfaq shumë i sigurt në vlerësimet e tij. Kur u pyet si e parashikon fundin e ndeshjes, shqiptari u përgjigj me vetëm dy fjalë: «Me nokaut». Prenga shtoi se i ka studiuar me kujdes pikat e forta dhe të dobëta të kundërshtarit: «Çdo boksier ka dobësi dhe mund të rrëzohet. E respektoj Anthony Joshuan, por të shtunën do të tregoj se për çfarë jam përgatitur».
Nëse Prenga arrin ta realizojë premtimin e tij, do të shkaktonte një nga befasitë më të mëdha të boksit ndërkombëtar këtë vit. Sytë e botës së boksit, por edhe të shqiptarëve kudo ku ndodhen, do të jenë ngulur në arenën e Jeddah të shtunën mbrëma.
BurimiTelegrafi Sport
