Lidhja Demokratike e Kosovës ka braktisur kërkesën e saj për balancë institucionale, duke i hapur kështu rrugë procesit të konstituimit të Kuvendit dhe formimit të Qeverisë. Deputeti i LDK-së, Avdullah Hoti, bëri të ditur se partia e tij është e gatshme të luajë rol konstruktiv edhe në gjetjen e një kandidati konsensusi për kreun e shtetit kosovar.
Sipas Hotit, sekuenca duhet të ndjekë një rend të qartë: fillimisht mbahet seanca konstituive e Kuvendit, pastaj formohet Qeveria dhe vetëm pas kësaj hapet diskutimi për zgjedhjen e Presidentit. Ai vlerëson se nuk ka asnjë justifikim për vonesa në këtë proces.
LDK: 60 ditë për të arritur kompromis për Presidentin
"Kemi diskutuar gjerësisht për këtë çështje brenda strukturave të Lidhjes Demokratike të Kosovës dhe kemi ardhur në përfundim që, në funksion të shterimit të situatës, t'i japim mundësi që të ecet përpara me themelimin e institucioneve të vendit. Kemi hequr dorë nga kërkesa jonë për balancë të institucioneve dhe kemi treguar gatishmërinë tonë që, në fazën kur vijmë te diskutimi për zgjedhjen e Presidentit, të jemi konstruktivë në gjetjen e një zgjidhjeje të përshtatshme dhe të pranueshme për gjithë spektrin politik", deklaroi Hoti.
Ai sqaroi se partia fituese e zgjedhjeve, bashkë me partnerët e saj koalicionarë, disponon numrin e nevojshëm të votave për të zgjedhur kryetarin e Kuvendit dhe për të formuar Qeverinë. Pas konstituimit të plotë të institucioneve, do të hapet një dritare prej 60 ditësh për diskutimet mbi figurën e Presidentit.
"Aty i kemi 60 ditë për të kryer diskutimet, nëse mund të arrijmë tek një kandidat që është i pranueshëm për të gjitha palët. Edhe ne si LDK shprehim gatishmërinë tonë që të kontribuojmë në atë proces", shtoi deputeti i LDK-së.
Seanca konstituive, kërkesë me ngulm
Sa i përket pjesëmarrjes eventuale në takimin e thirrur nga ushtruesja e detyrës së Presidentes, Albulena Haxhiu, Hoti u shpreh se LDK do të bëjë me kohë një njoftim zyrtar. Megjithatë, ai theksoi me forcë se thirrja e seancës konstituive të Kuvendit mbetet prioriteti kryesor i partisë.
"Ne kemi kërkuar dhe vazhdojmë ta kërkojmë me ngulm thirrjen e seancës konstituive të Kuvendit. Nuk ka asnjë arsye për vonesat", nënvizoi Hoti, duke shtuar se hapësira për kompromis ekziston dhe duhet shfrytëzuar.
Qëndrimi i ri i LDK-së vjen në një moment të ndjeshëm për institucionet e Kosovës, ku bllokimi politik pas zgjedhjeve ka vonuar konstituimin e organeve qendrore të shtetit. Gatishmëria e shprehur nga partia opozitare mund të ndikojë ndjeshëm në dinamikën e negociatave ndërpartiake gjatë ditëve në vijim.
BurimiRTSH
