Gjykata Supreme e Republikës së Kosovës ka refuzuar padinë e Ministrisë së Drejtësisë kundër Odës së Avokatëve të Kosovës, duke e cilësuar atë të palejueshme proceduralisht. Nëpërmjet aktvendimit P.A.nr.17/2026, gjykata konstatoi se objekti i padisë nuk binte brenda kompetencës së saj, duke e lënë çështjen pa u shqyrtuar fare në themel.
Oda e Avokatëve e Kosovës e vlerësoi vendimin si dëshmi se kompetencat institucionale ushtrohen në bazë të Kushtetutës dhe ligjit, jo sipas vullnetit politik. Sipas njoftimit zyrtar, asnjë institucion nuk mund t'i zgjerojë vetë kompetencat e tij përtej kufijve të caktuar shprehimisht me ligj.
Oda njoftoi gjithashtu se nuk do të njohë dhe nuk do të zbatojë vendime apo urdhra të nxjerra nga organe që veprojnë jashtë kompetencave ligjore. Sipas saj, autonomia e këtij institucioni nuk është privilegj, por garanci kushtetuese për pavarësinë e avokatit dhe të drejtën e qytetarëve për mbrojtje të lirë.
Vendimi i Gjykatës Supreme është përfundimtar dhe nuk mund të ankimohet.
