Shqipëria ndodhet në shënjestër të luftës hibride të dy aktorëve shtetërorë — Rusisë dhe Iranit — sipas ekspertit moldav të sigurisë Valeriu Pașa. Pozicioni i saj si shtet anëtar i NATO-s dhe kandidate aktive për anëtarësim në Bashkimin Europian e kthejnë vendin në një objektiv strategjik për ata që synojnë të dobësojnë strukturat perëndimore të sigurisë.
Pașa sqaron se lufta hibride nuk shfaqet vetëm me armë, por merr forma shumëdimensionale: ndërhyrje politike nëpërmjet financimit të aktorëve vendas, sulme kibernetike, vjedhje informacioni dhe dëmtim i ekonomisë kombëtare. "Mund të nisë nga ndërhyrja politike, kur një qeveri e huaj, përmes shërbimeve të saj speciale, financon aktorë politikë, i krijon ata dhe përpiqet t'i sjellë në pushtet, duke marrë kështu nën kontroll pjesë të sovranitetit të vendeve të tjera", thotë eksperti.
Pse Rusia dhe Irani kanë interes të destabilizojnë Shqipërinë
Sipas Pașës, Moska ka interes të drejtpërdrejtë në pengimin e zgjerimit të Bashkimit Europian dhe NATO-s, pasi ky zgjerim i kufizon hapësirën e ndikimit. "Dobësimi i Bashkimit Europian, shkatërrimi i tij apo kthimi i tij në një organizëm jofunksional është në interesin e Rusisë. E njëjta gjë vlen edhe për NATO-n. Ata e urrejnë NATO-n. Duan ta shkatërrojnë atë", deklaroi eksperti moldav. Për Iranin, arsyeja është e ndryshme por po aq konkrete: Shqipëria strehon grupe të opozitës iraniane, gjë që e ka vënë Teheranin në pozicion armiqësor ndaj Tiranës prej vitesh.
Pașa thekson se ndër pasojat më të rrezikshme të fushatave të dezinformimit është gërrryerja e besimit të qytetarëve ndaj institucioneve, mediave dhe shoqërisë civile. "Njerëzit arrijnë ndoshta në pikën ku thonë: 'Nuk i besoj askujt.' Ky është rezultati i përsosur. Një shoqëri që nuk i beson askujt është shumë më e lehtë për t'u manipuluar", paralajmëron ai.
Transparenca dhe strategjia — dy shtylla të mbrojtjes
Eksperti moldav skicon edhe hapat që duhet të ndërmarrë një shtet për t'u mbrojtur. Hapi i parë, sipas tij, është kuptimi i qëllimeve të sulmuesit: "Të kuptojmë se çfarë po përpiqen të arrijnë — ky është hapi i parë drejt ndërtimit të një kundërstrategjie efikase." Hapi i dytë është transparenca institucionale, e cila ndërton besim publik dhe mbyll boshllëqet që propagandës i duhen për të ushtruar ndikim. Çdo informacion i fshehur me interes publik, sipas Pașës, bëhet menjëherë lëndë e parë për dezinformatën.
Ai nënvizon gjithashtu se qeveria nuk mund të jetë aktori i vetëm i mbrojtjes. Lufta kundër kërcënimeve hibride kërkon bashkëpunimin e plotë të institucioneve shtetërore, partive politike, mediave të pavarura dhe shoqërisë civile. Për Shqipërinë, ky bashkëveprim mbetet jo vetëm i domosdoshëm, por urgjent, duke pasur parasysh intensifikimin e trysnive të jashtme ndaj vendeve të rajonit me orientim perëndimor.
BurimiJava News
