Kryetarja e grupit parlamentar të Vetëvendosjes, Arbërie Nagavci, deputetet Fatmire Kollçaku dhe Liza Gashi, si dhe këshilltari politik Ragmi Mustafi u ndalën nga autoritetet kufitare serbe më 9 tetor 2026 në pikën kufitare të Depçës, ndërsa udhëtonin për në Preshevë për të shprehur ngushëllime kryetares së kësaj bashkie, Ardita Sinani, pas humbjes së babait të saj. Pas mbi dy orësh pritje pa asnjë sqarim zyrtar, delegacionit iu ndalua vazhdimi i rrugës. Si rrjedhojë, ngushëllimet u shprehën pranë kufirit, ku Sinani zbriti vetë me anëtarë të familjes për të takuar delegacionin.
Hyseni: "Kontrolli kufitar nuk mund të shndërrohet në mjet presioni politik"
Analisti nga Presheva, Nehat Hyseni, e cilësoi bllokimin e delegacionit si të papranueshëm, duke theksuar se incidenti bart peshë politike dhe se një vizitë ngushëllimi nuk duhet të ngatërrohet me llogaritje politike apo tensione ndërshtetërore. Sipas tij, vendimi i policisë kufitare serbe u mor pa bazë ligjore të qartë dhe pa asnjë justifikim bindës, duke e vënë në pikëpyetje paanshmërinë e zbatimit të ligjit. "Është vërtet e rëndë kur autoritetet shtetërore nuk janë në gjendje të tregojnë as minimumin e respektit për një akt të thjeshtë njerëzor, siç është shprehja e ngushëllimeve ndaj një familjeje të goditur nga vdekja," deklaroi Hyseni.
Analisti vuri në dukje se çdo vendim që kufizon lirinë e lëvizjes duhet të ketë bazë ligjore, të jetë i shpjegueshëm dhe i ankimueshëm. Kur një delegacion mbahet për orë të tëra dhe kthehet mbrapsht pa arsye bindëse, lind me të drejtë pyetja nëse ligji zbatohet në mënyrë të paanshme apo nëse pushteti administrativ përdoret për të dërguar mesazhe politike.
Presheva, Bujanoci dhe Medvegja — jo thjesht emra në hartë
Hyseni shtoi se incidenti duhet parë në kontekstin e marrëdhënieve të tensionuara midis Kosovës dhe Serbisë, ku nën qeverinë e Aleksandar Vučićit kanë dominuar mosbesimi, përplasjet politike dhe interpretimet kontradiktore të proceseve të normalizimit. Sipas tij, Presheva, Bujanoci dhe Medvegja nuk janë thjesht emra në hartën administrative të Serbisë, por zona me popullsi shqiptare që kanë lidhje të forta familjare, kulturore dhe kombëtare me Kosovën. Çdo ndalim arbitrar dëmton jetën e përditshme dhe ushqen pasigurinë dhe ndjenjën e diskriminimit.
Analisti i bëri thirrje Serbisë të japë përgjigje konkrete: cila ishte baza ligjore për ndalimin, kush e mori vendimin dhe cilat procedura u ndoqën. Heshtja institucionale, sipas tij, thellohet mosbesimi dhe krijon përshtypjen se vendimet në kufi varen nga vlerësimet politike të momentit. Normalizimi me Kosovën, nënvizoi Hyseni, nuk arrihet vetëm nëpërmjet marrëveshjeve të nënshkruara, por edhe nëpërmjet trajtimit të qytetarëve dhe respektimit të të drejtave të tyre. "Besimi politik nuk mund të kërkohet ndërsa institucionet prodhojnë mosbesim," përfundoi ai, duke i bërë thirrje Beogradit për transparencë të plotë dhe garanci se raste të tilla nuk do të përsëriten.
BurimiAlbeu
